कश्मीरमा मूल्यवृद्धि विरोधमा प्रदर्शन : प्रहरी निरीक्षकको मृत्यु, ९० जनाभन्दा बढी घाइते
वैशाख ३०, २०८१ आइतबार १३:५:३७
स्लामावाद : पाकिस्तान प्रशासित काश्मिरमा बिजुली र पिठोको मूल्यवृद्धिलाई लिएर शनिबार भएको प्रदर्शनका क्रममा प्रदर्शनकारी र प्रहरीबीच हिंसात्मक झडप भएको छ ।
स्थानीय पत्रकार मोहम्मद जुबैर खानले बीबीसी उर्दूलाई यस हिंसात्मक झडपमा एक प्रहरीको मृत्यु भएको बताएका छन्। यस हिंसात्मक घटनामा विभिन्न क्षेत्रमा ९० जनाभन्दा बढी घाइते भएको समाचार छ ।
पाकिस्तान प्रशासित कश्मीरमा सरकारका प्रवक्ता अब्दुल माजिद खानले मिरपुर इस्लामगढमा प्रदर्शनकारीको गोलीका कारण छातीमा गोली लागेर प्रहरी निरीक्षक अदनान कुरेशीको मृत्यु भएको दाबी गरेका छन् । उनको शव जिल्ला सदरमुकाम मिरपुरमा ल्याइएको छ ।
उनका अनुसार अदनान कुरैशीले जनताको जीवन र सम्पत्तिको सुरक्षा गरिरहेका थिए । आन्दोलनकारीलाई कानुनबमोजिम कारबाही गरिने प्रवक्ताले बताए ।
मुजफ्फराबादमा पनि केही स्थानमा सानातिना झडप भएका छन्, प्रहरीले अराजक तत्वलाई नियन्त्रण गर्ने प्रयास गरिरहेको उनले बताए ।
जम्मू र कश्मीर संयुक्त अवामी एक्शन कमिटीले मुजफ्फराबादमा लामो मार्च र धर्ना आह्वान गरेको थियो। यस समितिमा कश्मीरका अधिकांश व्यापारी वर्गका मानिसहरू समावेश छन्। यो समितिले बिजुलीको मूल्यवृद्धि र पिठोको मूल्यवृद्धिको विरोध गरेको थियो ।
उक्त आह्वानपछि स्थानीय प्रशासनले आन्दोलनकारीलाई रोक्न मुजफ्फराबाद प्रवेश गर्ने र पुग्ने सबै बाटो बन्द गरेको थियो । बुधवार–बिहीबार राति यस समितिका धेरै कार्यकर्तालाई प्रहरीले पक्राउ समेत गरेको छ ।
शनिबार लङमार्चको एक दिनअघि शुक्रबार पनि समितिले सडक अवरुद्ध गर्दै पसल बन्द गर्ने घोषणा गरेको थियो । पाकिस्तान प्रशासित कश्मीरको राजधानी मुजफ्फराबाद, धाडियाल, कोटली र अन्य क्षेत्रहरूमा दुई दिनदेखि सामान्य जनजीवन ठप्प भएको थियो र बन्द जारी थियो। बीबीसी
प्रतिक्रिया दिनुहोस !
