लन्डन : बेलायती टेनिस स्टार इम्मा राडुकानुले फ्रेन्च ओपन छनोटबाट हात झिकेकी छन् । सन् २०२१ को अमेरिकी (यूएस) ओपन विजेता राडुकानुले फ्रेन्च ओपनको छनोट प्रतियोगिता नखेल्ने निर्णय लिएकी हुन् ।
२१ वर्षीया राडुकानुले फ्रेन्च ओपनको छनोट प्रतियोगिताबाट किन हात झिकिन् भन्ने कुरा भने खुलाइएको छैन । फ्रेन्च ओपनको छनोट प्रतियोगिता सोमबारदेखि सुरु हुँदैछ । राडुकानुले छनोट प्रतियोगिताको पूर्वसन्ध्यामा सहभागिता नजनाउने निर्णय लिएकी हुन् । फ्रेन्च ओपन भने मे २६ बाट फ्रान्सको राजधानी पेरिसमा सुरु हुँदैछ ।
क्ले कोर्टको ग्रान्डस्लामका लागि ‘वाइल्ड कार्ड’ नदिएका कारण राडुकानुले प्रतियोगिताबाट हात झिकेको हुन सक्ने अन्तर्राष्ट्रिय सञ्चार माध्यमले जनाएका छन् । गत महिना म्याड्रिड ओपनको पहिलो चरणमै हार बेहोरेपछि उनले कुनै पनि खेल खेलेकी छैनन् । अर्जेन्टिनाकी क्वालिफायर मारिया लुर्डेस कार्लसँग सिधा सेटमा पराजय बेहोरेपछि राडुकानुले आफू मानसिक तथा भावनात्मक रुपमा थाकेको बताएकी थिइन् ।
‘पछिल्लो केही साता मेरा लागि निकै महत्वपूर्ण रहे । तर, आजको प्रदर्शनबाट के स्पष्ट भएको छ भने म मानसिक तथा भावनात्मक रुपमा थाकेको छु’, उनले त्यतिखेर भनेकी थिइन्, ‘म अगाडि बढ्ने कोसिस गरिरहेको छु । यो हार पनि यसको सिकाइ हुनसक्छ ।’
पछिल्लो समय राडुकानु विश्व वरीयतामा दुई सय १२औं स्थानमा छिन् । गत वर्ष खुट्टाको शल्यक्रियाका कारण तीन सय तीन स्थानमा झरेकी थिइन् ।
प्रतिक्रिया दिनुहोस !
