ढल्केवर(धनुषा): महोतरीको गौशालामा गोली प्रहार गरेर लुटपाट गरेको आरोपमा दुईजनालाई प्रहरीले पक्राउ गरेको छ । पक्राउ पर्नेमा धनुषा सबैला–९ का ४७ वर्षीय शशि शंकर कापर र महोत्तरी भंगहा–२ का ३० वर्षिय आशिष कुमार कंठ रहेको प्रहरीले जनाएको छ ।
जिल्ला प्रहरी कार्यालय महोत्तरीले बिहीबार पत्रकार सम्मेलन गरी उनीहरुलाई सार्वजनिक गरेको छ । गत जेठ २८ गते खोलाको बाटो हुँदै घरतर्फ जाँदै गरेका गौशाला नगरपालिका–११ का ३८ वर्षिय विनय कुमार सिंहमाथि मरहा खोलामा गोली प्रहार गरिएको थियो ।
सिंहलाई गोली प्रहार गरेको आरोपमा पक्राउ परेका कापर र कंठ अपराधि पृष्ठभूमिको रहेको प्रहरीले जनाएको छ । कापरले १० वर्ष र कंठले ३० महिना सजय भोगेको जिल्ला प्रहरी कार्यालय महोतरीका प्रहरी नायव उपरीक्षक सन्तुलाल प्रसाद जैसवारले जानकारी दिए ।
उनीहरुबीच जेलमा बस्दा आपसमा चिनजान भएको प्रहरीको अनुसन्धानबाट खुलेको हो । प्रहरी नायव उपरीक्षक जैसवारका अनुसार अपराधमा प्रयोग भएको हतियार र मोटरसाइकल समेत बरामद भएको छ ।
पक्राउ परेका दुबैजनालाई हातहतियार तथा खरखजना,चोरी डाका, ज्यान मार्ने उद्योग र संगठित अपराध गरि चार मुद्दा दर्ता गरि अनुसन्धान भइरहेको जिल्ला प्रहरी कार्यालय महोतरीका प्रहरी उपरीक्षक नकुल पोखरेलले बताए ।
प्रतिक्रिया दिनुहोस !
