नुवाकोट : नुवाकोटको दाङसिङमा प्रहरी कार्यालय भवन निर्माण गरिएको छ । आफ्नै भवन निर्माण भएपछि प्रहरीलाई सेवा सञ्चालनमासमेत सुविधा पुगेको छ।
तारकेश्वर गाउँपालिका १ दाङसिङमा नेपाल सरकारको कुल दुई करोड १७ लाख ९० हजार चारसय १४ रुपैयाँको लागतमा दाङसिङ प्रहरी चौकीको निर्माण गरिएको हो । नवसनर्मित सो प्रहरी कार्यालय भवनको बुधवार बागमती प्रदेश प्रहरी प्रमुख तथा प्रहरी नायव महानिरीक्षक विष्णुकुमार केसीले उद्घाटन गरे ।
उनले सर्वसाधारणको जिउधनको सुरक्षा गर्नु र शान्तिसुरक्षामा प्रभावकारिता ल्याउनु प्रहरीको पहिलो कर्तव्य भएको उल्लेख गर्दै भवन निर्माणसँगै गाउँबासीले प्रहरीबाट प्रभावकारी रुपमा शान्ति सुरक्षा प्राप्त गर्ने विश्वास व्यक्त गरे । नेपाल सरकारबाट विनियोजित रकमबाट भुकम्प प्रतिरोधी साँढे दुई तले १० कोठे व्यारेकसहितको प्रहरी चौकी भवन सञ्चालन गरिएको प्रहरी उपरीक्षक शान्तिराज कोइरालाले बताए ।
भवन नुहुँदा यसअघि टहरोमा अस्थायी रूपमा बसेर प्रहरीले सेवा गर्दै आएको थियो । सो दाङसिङ प्रहरी चौकीमा प्रहरी सहायक निरीक्षकको नेतृत्वमा ११ जना प्रहरी कार्यरत रहेका छन् ।
प्रहरी चौकी कार्यालय तथा ब्यारेक भवन उद्घाटन कार्यक्रममा तारकेश्वर गापा अध्यक्ष शिव अधिकारी अविरल, उपाध्यक्ष हरिप्रसाद रिमाल, सहायक प्रजिअ कृष्णप्रसाद हुमागाईंलगायतले भवन निर्माणबाट भएको सुविधा र सेवाका सम्बन्धमा चर्चा गरेका थिए । उक्त भवन निर्माण कार्यमा उल्लेखनीय भूमिका निर्वाह गरेका विभिन्न व्यक्तिहरूलाई प्रशंसा– पत्र प्रदान गरिएको थियो ।
प्रतिक्रिया दिनुहोस !
