बजेट निर्माणमा जुटेपछि सुदूपश्चिमका मुख्यमन्त्री शाहले गरे भेटघाट बन्द
साउन २९, २०८१ मंगलबार १२:४४:२५
धनगढी : सुदूरपश्चिमका मुख्यमन्त्री कमलबहादुर शाहले अनावश्यक भेटघाट बन्द गरेका छन्। मुख्यमन्त्री शाहले भदौको १५ गतेसम्म आफूलाई भेटन नआउन समेत अनुरोध गरेका छन् । मुख्यमन्त्री शाहको सचिवालयले सूचना जारी गर्दै सुदूरपश्चिमबासी, शुभचिन्तक, नेता कार्यकर्ता सबैलाई कार्यव्यस्ताको कारण देखाउँदै भेटन नआउन आग्रह गरेको हो ।
मुख्यमन्त्री शाहले भदौ १५ गतेसम्म व्यक्तिगत,संस्थागत कार्यक्रममा पनि नजाने र सामूहिक भेटघाट तथा बधाई सबै कार्यक्रम बन्द गरेका छन् । ‘मुख्यमन्त्रीज्युको कार्यव्यवस्तताले व्यक्तिगत संस्थागत तथा सामूहिक भेटघाट र बधाई सबै कार्यक्रमहरू बन्द गरिएका छन्,'सचिवालयले जारी गरेको सूचनामा उल्लेख गरिएको छ ।
शाह साउनको २० गते मुख्यमन्त्रीमा नियुक्त भएका थिए । मुख्यमन्त्री नियुक्त भएदेखि कार्यालयमा र निवासमा शुभचिन्तक,नेता कार्यकर्ता र आफन्तहरूको घुइँचो लागेको थियो । प्रदेशमा बजेट शून्यताको अवस्था छ । अध्यादेशबाट कर संकलन सुरु गरिएपनि प्रदेशको विनियोजन विधेयक निष्कृय अवस्थामा छ ।
सचिवालयले बजेट बनाउने,चालु वर्षको कामको योजना बनाउनेलगायतका कामहरू,बधाई तथा भेटघाटले प्रभावित भएपछि सूचना जारी गरिएको शाहको सचिवालयले जनाएको छ । प्रदेश सरकार अहिले बजेट बनाएर केही दिनमा संसदमा लैजाने तयारीमा जुटेको छ ।
प्रतिक्रिया दिनुहोस !
