युक्रेनद्वारा ७४ वटा रुसी गाउँ कब्जा

युक्रेनी राष्ट्रपति जेलेन्स्कीले मंगलबार साँझ राष्ट्रका नाममा सम्बोधन गर्दै आफ्नो सेनाले रुसको कुर्स्क क्षेत्रका ७४ वटा गाउँ कब्जा गरेको बताए । युक्रेनी सेना रुसतर्फ अग्रसर भई रुसी सेनालाई कब्जामा लिइरहेको बताइएको छ ।

युक्रेनले गरेको अकस्मात आक्रमणपछि दुई लाख रुसी नागरिक घर छोडेर भाग्न बाध्य भएका  बीबीसी समाचारमा उल्लेख छ । उनीहरूलाई सुरक्षित स्थानमा पठाइएको छ ।

युक्रेनले अगस्ट ६ मा रुसको कुर्स्क क्षेत्रमा आक्रमण गरेको थियो । युक्रेनले अगस्ट १३ सम्म रुसको एक हजार वर्ग किलोमिटर क्षेत्र कब्जा गरेको छ । न्यूयोर्क टाइम्सका अनुसार दोस्रो विश्वयुद्धपछि कुनै देशले रुसको सीमामा घुसपैठ गरेको यो पहिलो पटक हो ।

२४ फेब्रुअरी २०२२ मा सुरु भएको रुस–युक्रेन युद्धको मंगलबार ९०० दिन पूरा भएको छ । साढे दुई वर्षदेखि चलिरहेको यो युद्धमा रुसका लागि पछिल्लो हप्ता निकै खराब साबित भएको छ । युक्रेनले पहिलो पटक रुसमाथि प्रहार गरेको हो।

सीएनएनका अनुसार यो वर्ष रुसले जति युक्रेनी भूभाग कब्जा गरेको छ त्यति नै जमिन युक्रेनले मात्रै ७ दिनमा कब्जा गरेको छ । अमेरिकास्थित युद्ध अध्ययन संस्थान (आइएसडब्लु) का अनुसार रुसले २०२४ मा युक्रेनको १,१७५ वर्ग किलोमिटर क्षेत्र कब्जा गरेको छ।
 
युद्ध सुरु भएको साढे दुई वर्षमा रुसले युक्रेनको १ लाख वर्ग किलोमिटर क्षेत्र कब्जा गरेको छ । यो युक्रेनको कुल भूमि क्षेत्रको १८% हो। युक्रेनले अब जवाफी आक्रमण सुरु गरेको छ र रुसको १ प्रतिशत भूभाग कब्जा गरेको छ।

यसअघि सोमबार रुसले युक्रेनी सेनाले आफ्नो २८ गाउँ कब्जा गरेको बताएको थियो । यस अवधिमा १२ रुसी सर्वसाधारण मारिएका छन् भने १२१ घाइते भएका छन्। कुर्स्कका गभर्नर एलेक्सी स्मिर्नोभले ६ दिनमा युक्रेनी सेना कुर्स्कको करिब १२ किलोमिटर भित्र र ४० किलोमिटर चौडा क्षेत्रमा फैलिएको बताएका छन् ।
 
पुटिनले सोमबार कुर्स्कका स्थानीय नेता र अधिकारीहरूसँग भेटघाट गरेका थिए। उनले युक्रेनी आक्रमणलाई उत्तेजक कार्य भनेका छन् । उनले आफ्ना रक्षा अधिकारीहरूलाई युक्रेनी सेनालाई रुसी भूभागबाट हटाउन आदेश दिएका छन्।

पुटिनले युक्रेनले रुसी भूभाग कब्जा गरेर युद्धविराम सम्झौताका लागि आफ्नो अडानलाई बलियो बनाउन चाहेको भएपनि आफूहरु कुनै सम्झौता नगर्ने बताए । उनले युक्रेनले रुसी नागरिकको हत्या गरेको र आणविक उर्जा केन्द्र नजिकै हमला गरेको आरोप लगाए ।