हिमताल फुटेको आशंका
बाढीले खुम्बुको थामे गाउँ डुब्यो,जोरसल्लेमा होटल बगायो
साउन ३२, २०८१ शुक्रबार १६:१४:६
सोलुखुम्बु : अकस्मात बाढी आउँदा थामे गाउँ डुबानमा परेको छ । शुक्रबार दिउँसो २ बजेतिर थामेभन्दा माथिबाट बाढी आउँदा खुम्बु पासाङ ल्हामु गाउँपालिका-५ थामे गाउँ डुबानमा परेको हो। सगरमाथा क्षेत्रको हिमताल फुटेको आशंका गरिएको छ।
बाढीले जोरसल्लेको एउटा होटल बगाएको खुम्बु पासाङ ल्हामु गाउँपालिकाले जनाएको छ ।
कुन हिमताल फुटेको हो भन्ने यकिन हुन सकेको छैन । घटनास्थलमा इलाका प्रहरी चौकी नाम्चेबाट प्रहरी सहायक निरीक्षक खेमराज खतिवडाको कमान्डमा प्रहरी टोली परिचालन भएको नाम्छे प्रहरी चौकीले जनाएको छ ।
थामु प्रहरी चौकीबाट पनि प्रहरी खटिएको जनाइएको छ । यद्यपि घटनास्थलमा प्रहरी पुग्न अझै केही समय लाग्ने लुक्ला प्रहरी चौकीका प्रहरी इन्चार्ज सइ हेमबहादुर कटवालले जानकारी दिए। ताल फुट्दा भोटेकोसीमा बाढी आएको छ ।
उक्त बाढीले सोलुको तल्लो क्षेत्रमा निर्माण गरिएको जलविद्युत आयोजनाहरूमा ठूलो क्षति पुर्याउने सम्भावना देखिएको छ । क्षतिको थप विवरण आउन बाकी रहेको सोलुखुम्बु प्रहरीले जनाएको छ ।
प्रतिक्रिया दिनुहोस !
