काठमाडौं : युवा उद्यमीहरूले सुरू गरेको स्टार्टअप व्यावसायको प्रवर्द्धन गर्न अन्नपूर्ण मिडिया नेटवर्कले सुरू गरेको ‘स्टार्टअपसँग अन्नपूर्ण’ अभियानमा किलिण्डर सर्भिसेज प्रालि जोडिएको छ । सोमबार नेटवर्कको तीनकुनेस्थित केन्द्रीय कार्यालयमा भएको एक समारोहमा उक्त सम्झौता भएको हो ।
सम्झौतापत्रमा अन्नपूर्ण मिडिया नेटवर्कका महाप्रबन्धक मनोज बस्नेत र किलिण्डर सर्भिसेज प्रालिका संस्थापक रवि किरण यादवले हस्ताक्षर गरे । किलिण्डरले सार्वजनिक यातायातलाई डिजिटल टिकेटिङ सेवासहित बृहत् टिकेटिङ व्यवस्थापन प्रणाली प्रदान गर्दै आइरहेको छ । यसका अलावा सरकारी तथा गैरसरकारी संस्थाहरूको आवश्यकता अनुसार टिकेटिङ व्यवस्थापन प्रणाली निर्माण गरिदिने सेवा समेत प्रदान गरिरहेको छ ।
‘यो अभियानसँग जोडिन पाउँदा खुसी लागेको छ,’किलिण्डर सर्भिसेज प्रालिका संस्थापक रवि किरण यादव भने, ‘यसले स्टार्टअप कम्पनीहरूले थालेको परियोजनालाई बजारीकरण,ब्रान्डिङ र केयरिङमा सघाउनेछ ।’
अभियानमा जोडिदा टिकेटिङ व्यवस्थापन प्रणालीलाई बृहत्रुपमा कार्यान्वयनमा ल्याउन मदत गर्ने उनले बताए । यो अभियानमा नेटवर्कका सबै प्लेटफर्महरू सहभागी हुनेछन् । नेटवर्कले हाल नेपाली संस्करण अन्नपूर्ण पोस्ट दैनिक, अंग्रेजी द अन्नपूर्ण एक्सप्रेस डेली,रेडियो अन्नपूर्ण नेपाल ९४ मेगाहर्ज,अनलाइन न्यूज पोर्टल अन्नपूर्ण पोस्ट डट कम, एपीवान टेलिभिजनलगायतका मिडिया प्लेटफर्महरू सञ्चालन गर्दै आइरहेको छ ।
प्रतिक्रिया दिनुहोस !
