ताप्लेजुङ : दोस्रो ताप्लेजुङ गोल्डकपको उपाधि सगरमाथा युथ क्लबले जितेको छ । सिरहाको सलहेस युथ क्लबलाई १–० गोलले पराजित गर्दै मोरङको सगरमाथाले उपाधि उचालेको हो । खेलको दोस्रो मिनेटमा सगरमाथाका विजय भुजेलले गरेको गोल नै निर्णायक बनेको थियो ।
निर्धारित समयमा दुवै समूहले आक्रामक खेल प्रस्तुत गरेपनि सिरहाले कुनै गोल फर्काउन नसक्दा पराजय बेहोर्न बाध्य भयो । विजेता सगरमाथाले पाँच लाख रुपैयाँ नगद पुरस्कार पायो । उपविजेता सहलेसले दुई लाख ५० हजार पाँच सय ५५ रुपैयाँमा चित्त बुझायो । प्रतियोगितामा विभिन्न बिधाका उत्कृष्ट खेलाडीलाई पनि नगद पुरस्कारबाट पुरस्कृत गरिएको थियो ।
भदौ ३ गतेबाट सुरु भएको अन्तर्राष्ट्रिय आमन्त्रण ताप्लेजुङ गोल्डकपमा भारतको एकसहित आठ टोलीको सहभागिता रहेको थियो । लाखेजात्रा सञ्चालन समितिले लाखेजात्राको अवसर पारेर प्रत्येक वर्ष यो प्रतियोगिता आयोजना गर्दै आएको छ ।
एकैदिन १० लाख १४ हजार संकलन
आयोजकले फाइनलको दिन मात्र प्रवेश शुल्कबाट १० लाख १४ हजार रुपैयाँ संकलन गरेको छ । आयोजक संस्था लाखेजात्रा सञ्चालन समितिले सोमबार फाइनलका दिन चार हजार ५६ जनाले टिकट लिएको र त्यसवापत १० लाख १४ हजार रुपैयाँ संकलन भएको कोषाध्यक्ष निरोज श्रेष्ठले जानकारी दिए ।
यसअघिका ६ खेलको प्रवेश शुल्क वापत समितिले १३ लाख ६२ हजार ६ सय रुपैयाँ संकलन गरेको थियो । योसँगै यस वर्षको प्रवेश शुल्क वापत २३ लाख ७६ हजार ६ सय रुपैयाँ संकलन गरेको छ । फाइनलको प्रवेश शुल्क जनही दुई सय ५० रुपैयाँ तोकिएको थियो ।
प्रतिक्रिया दिनुहोस !
