द्वन्द्वकालको विस्फोटक पदार्थ बच्चाले भेटाएपछि...

फिदिम : पाँचथरको फालेलुङ गाउँपालिका— ५ स्थित कालिका माध्यमिक विद्यालय प्राङबुङको कक्षा ६ मा अध्ययनरत ११ वर्षीय दिप्सन साँवा बिहीबार सबेरै घर फर्किए । विद्यालयमा परीक्षा चलिरहेकाले दिप्सनजस्तै डाँडागाउँका अरू थुप्रै केटाकेटी चाँडै घर पुगेका थिए ।

घरमा पुगेर दिप्सनले दुई वर्षीया बहिनी प्रिन्सालाई लिएर छिमेकी आइतबहादुर केरुङको घरमा गए । आइतबहादुर सदरमुकाम फिदिममा बस्दै आएको निकै वर्ष भयो । आइतबहादुरको घरमा ज्ञानबहादुर राई बस्दै आएका थिए । ज्ञानबहादुर सदरमुकाम फिदिममा मजदुर गर्छन् । उनी घरमा थिएनन् । ज्ञानबहादुरका ११ वर्षीय छोरा पवन राई दिप्सनका खेल्ने साथी हुन् । पवनका ७ वर्षीय भाइ दीपेश पनि घरमै थिए । उनीहरू चार जनाको समूहमा थिए ।

नानीका आमाहरू मेलापात गएका थिए । दिप्सनका बुवा दिलीप साँवा वैदेशिक रोजगारीको सिलसिलामा दुबईमा छन् । घरमा ठूलो मान्छे नभएको बेला चार जना केटाकेटी जम्मा भएर रमाइलो गर्दै खेलिरहेका थिए । तर, उनीहरूको त्यो रमाइलो पल क्षणभरमै खोसियो ।  

मध्य दिउँसो एक्कासी जमिन थर्किने गरी विस्फोटको आवाज आयो । मेलापातमा रहेका गाउँलेहरू आतंकित भए । छिमेकमा रहेकी सोनी केरुङ विस्फोटको आवाज पछ्याउँदै आइतबहादुरको आँगनमा पुगिन् । ‘आँगनमा केटाकेटीहरू जलिरहेका थिए,’ घटना स्मरण गर्दै सोनीले भनिन्, ‘उनीहरूको शरीरबाट धुवाँ उडिरहेको थियो । कोही चिच्याइरहेका थिए, कोही नानीहरू बेहोस थिए ।’ 

केही क्षणमा गाउँलेहरू घटनास्थलमा जम्मा भए । प्रहरीहरू पनि घटनास्थलमा पुगे । गम्भीर घाइते दिप्सन साँवा, प्रिन्सा साँवा र पवन राईलाई जिल्ला अस्पताल फिदिम पठाइयो । सामान्य अवस्थामा रहेका दीपेश राईको प्राङ्बुङ स्वास्थ्य केन्द्रमा उपचार गरियो । 

घाइतेहरूलाई जिल्ला अस्पताल फिदिम ल्याइ पुर्याउँदा निकै अबेर भइसकेको थियो । अवस्था गम्भीर देखेपछि चिकित्सकहरूले दिप्सन र प्रिन्सालाई तत्काल झापाको बी एन्ड सी अस्पताल रेफर गरे । प्रिन्साको बाटोमै निधन भयो । उनका दाजु दिप्सनको बी एन्ड सीको बेडमा मध्यरातमा निधन भयो । घाइते पवनलाई पनि जिल्ला अस्पताल पाँचथरले शुक्रबार बी एन्ड सी रेफर गरेको छ ।

ग्रिनेट बिस्फोट हुँदा उक्त घटना भएको प्रहरीको प्रारम्भिक अनुमान छ । ‘घटनास्थलमा खोजतलास गर्दा अर्को विस्फोटक पदार्थ भेटियो,’ जिल्ला प्रहरी कार्यालय पाँचथरका प्रहरी नायब उपरीक्षक हेमन्त क्षेत्रीले भने, ‘उक्त वस्तु होममेड ग्रिनेट भएको हाम्रो अनुमान छ ।’ घटनास्थलमा भेटिएको अर्को बम फिदिमस्थित नेपाली सेनाको रणशेर दल गणको टोलीले शुक्रबार डिस्पोज गरेको छ ।  

घाइते दीपेशका अनुसार खेल्दाखेल्दै घर नजिकै एउटा मज्जाको डल्लो भेटियो । त्यसलाई फुटाएर हेर्ने उनीहरूलाई मन भयो । उनीहरूले फुटाउने कोसिस गरे । कसैगरी डल्लो फुटेन । हेम्मर ल्याएर उनीहरूले डल्लोलाई जोडले प्रहार गरे । ‘हेम्मरले हानेपछि ठूलो पडकएको थियो,’ घटना स्मरण गर्दै पवनले भने । 

घटनाको विषयमा विभिन्न किसिमको बहस सुरु भएको छ । द्वन्द्वकालका अवशेषको रूपमा रहेका विस्फोटक पदार्थ बच्चाले भेटाएपछि अप्रिय घटना भएको हुन सक्ने प्रमुख जिल्ला अधिकारी विष्णु कोइरालाले बताए । ‘यो द्वन्द्वकालकै विस्फोटक पदार्थ हो भन्ने लागेको छ,’ कोइरालाले भने, ‘घटनाको विषयमा थप अनुसन्धान भइरहेको छ ।’