काठमाडौं : एमाले अध्यक्ष एवं प्रधानमन्त्री केपी शर्मा ओलीले २०८४ को आवधिक निर्वाचनमा एमालेले कसैसँग चुनावी गठबन्धन नगर्ने स्पष्ट गरेका छन् । त्यसका लागि पार्टीको एकल बहुमत ल्याउने गरी काममा जुट्न पार्टीका नेताहरूलाई निर्देशन पनि दिएका छन् ।
पार्टीको मंगलबार बसेको पोलिटब्युरो बैठकमा अध्यक्ष ओलीले आगामी मंसिरमा हुने स्थानीय तहको उपनिर्वाचन र २०८४ को निर्वाचनका लागि पार्टीलाई बलियो बनाउन निर्देशन दिए ।
‘एमाले ०८४ को निर्वाचनमा कसैसँग गठबन्धन गर्दैन,’ ओलीले बैठकमा भनेका थिए, ‘एक्लै लड्छ । त्यसका लागि पार्टी बलियो बनाउन जुटौं ।’ अध्यक्ष ओलीले मंसिरमा हुने स्थानीय तहको उपनिर्वाचनमा पनि पार्टी एक्लै लड्ने बताएका थिए । ‘स्थानीय तहको उपचुनावमा हामी एक्लै लड्ने हो । त्यसैअनुसार अहिलेबाटै तयारी गर्नुपर्छ’, उनले भने ।
एकल बहुमतका लागि पार्टीका राजनीतिक, सांगठानिक कामलाई चुस्त दुरुस्त बनाउन र कार्ययोजना बनाएर कार्यान्वयनमा लैजान सक्नुपर्ने ओलीको निर्देशन थियो । ‘संगठनहरू चुस्त दुरुस्त हुनुपर्यो, प्रदेश कमिटीहरू राम्रोसँग चल्न सकेका छैनन्, माथिको आदेश कुरेर बसेर मात्रै हुँदैन’, अध्यक्ष ओलीले भने, ‘ग्राउन्डमा योजना बनाएर अघि बढ्नुपर्यो र बनेका योजनाहरू कार्यान्वयनमा लैजानुपर्यो ।’
अध्यक्ष ओलीले पार्टीलाई एकताबद्ध बनाएर सशक्त बनाउन निर्देशन दिएको पोलिटब्युरो सदस्य विशाल भट्टराईले जानकारी दिए । अध्यक्ष ओलीले पार्टीमा भएका अन्तरविरोधलाई समाधान गरी स्थानीय तहको निर्वाचन र ०८४ निर्वाचनको तयारीमा जुट्न पनि निर्देशन दिएको भट्टराईले जानकारी दिए । ‘समयमा नै कांग्रेसलाई सत्ता हस्तान्तरण गर्छौं ।’
बैठकमा अध्यक्ष ओलीले सहमतिअनुसार नै कांग्रेसलाई सत्ता हस्तान्तरण गर्ने जानकारी गराए । ‘समयमा नै कांग्रेसलाई सत्ता हस्तान्तरण गर्छौं, त्यसमा यता उता हुने कुरै छैन, उनले भने । गत शनिबार क्याप्टेन रामेश्वर थापाको ‘इन्टु द फायर’को पुस्तक विमोचन कार्यक्रममा पनि ओलीले आफ्नो नेतृत्वको सरकारको कार्यकालको मिति तोकेका थिए । त्यस बेला ओलीले आफू नेतृत्वको सरकारको कार्यकाल १ वर्ष १० महिना १५ दिनमात्रै बाँकी रहेको बताएका थिए ।
अराजकता दुस्साहसलाई निस्तेज पारिने
बैठकमा ओलीले एमाले सरकारमा गएदेखि नै पार्टी र सरकारमाथि प्रहार भइरहेको विश्लेषण सुनाएका थिए । सामाजिक अराजकता निम्त्याएर भाँडभैलो गराउने माओवादी अध्यक्ष प्रचण्डको चाहना पूरा नहुने ओलीको दाबी थियो । बैठकमा ओलीले भनेका थिए, ‘विद्रोह गराउने, सामाजिक अराजकता फैलाउने प्रयास भइरहेको छ तर यो सफल हुँदैन ।’
बंगलादेश र श्रीलंका बन्दै छ भनेर प्रचार गरिएकोमा ओलीले असन्तुष्टि पोखेका थिए । ओलीले माओवादी केन्द्रका अध्यक्ष पुष्पकमल दाहाल ‘प्रचण्ड’को बंगलादेश र श्रीलंका हुनसक्ने अभिव्यक्ति सत्ता बाहिर निस्किएपछिको पीडामात्र भएको बताए । ‘सरकारमा भइञ्जेल आफैं उपद्रो गर्ने, अनि अहिले बाहिर निस्केपछि असन्तुष्टहरू उचाल्ने र ओराल्ने काम भइरहेको छ’, ओलीले भनेका थिए, ‘जसरी बंगलादेश र श्रीलंकाको उदाहरण दिएर सदनमा बोलेको सुनियो, त्यो एउटा जिम्मेवार नेताले बोल्ने भाषा थिएन ।’ उनले गौरा पर्वको अवसरमा टुँडिखेलमा गएको गतिविधि पनि नियोजित भएको उनको भनाइ थियो ।
सरकारको काम कारबाही
प्रधानमन्त्री ओलीले सरकारको कामकारबाही राम्ररी चलिरहेको बिफ्रिङ गरेका थिए । उनले भने, ‘सरकार अहिले राम्ररी चलिरहेको छ । उद्देश्यअनुसार जनताका काम गरिरहेको छ । जनतालाई केन्द्रबिन्दुमा राखेर सरकार र पार्टी दुवैले काम गर्नुपर्छ ।’
पोलिटब्युरो सदस्य भट्टराईले अध्यक्षको समसामयिक परिस्थितिको बिफ्रिङका साथै बैठकमा महासचिव शंकर पोखरेलले पार्टीको वार्षिक कार्ययोजना पेस गरेको बताए । महासचिवको कार्ययोजनामाथि बुधबारको बैठकमा छलफल हुनेछ ।
एमाले प्रचार तथा प्रकाशन विभाग प्रमुख राजेन्द्रप्रसाद गौतमले महासचिव पोखरेलद्वारा प्रस्तुत कार्ययोजनामामाथि बुधबारको बैठकमा छलफल गरेर नेताहरूलाई जिम्मेवारीसहित देशैभर परिचालन गर्ने तयारी भएको बताए । प्रस्तावित कार्ययोजनामा सदस्यता विस्तारलगायत छन् ।
यो पनि पढ्नुहोस
प्रतिक्रिया दिनुहोस !
