मुगु: छायाँनाथ रारा नगरपालिका-२ स्थित चैन खोलामा झोलुंगे पुल निर्माण गरिएको छ। कुल १४७ मिटर लम्बाइ भएको झोलुंगे पुल शुक्रबार उद्घाटन गरी सञ्चालनमा ल्याइएको हो।
नगरपालिकाको १ करोड १० लाख १२ हजार ५ सय रुपैयाँको लगानीमा पुल निर्माण गरिएको हो। पुलको कर्णाली प्रदेश सभा सदस्य तथा पूर्व उद्योग, पर्यटन, वन तथा वातावरण मन्त्री जित बहादुर मल्ल र जिल्ला समन्वय समितिका प्रमुख मञ्जन बहादुर कार्कीले संयुक्त रूपमा उद्घाटन गरे।
पुल निर्माण भएसँगै सदरमुकाम गमगढीमा दैनिक उपभोग्य सामान किनमेल गर्न आउने जाने र छायाँनाथ मन्दिरमा दर्शन गर्न जाने भक्तजनहरू लगायत स्थानीयलाई सहज हुनुका साथै बालबालिकालाई विद्यालय पुग्न सहज हुने छायाँनाथ रारा नगरपालिकाका नगर प्रमुख विष्णु कुमार भामले बताए।
यो पुलले छायांनाथ रारा नगरपालिकाको १ वडा देखि ७ वडासम्मका नागरिक र जुम्ला जानेहरू लागि अझ सहज हुने छ। २०८१ वैशाख ३१ गते पुल निर्माणको सम्झौता गरेको कर्णाली इन्फास्ट्कचर डिभलोमेन्ट् सर्भिसले २०८१ पुस ३० गते सम्पन्न गर्नुपर्ने थियो। तर, पुल २ महिनाअघि नै पुल निर्माण भएको नगरपालिकाले जनाएको छ।
प्रतिक्रिया दिनुहोस !
