४ अर्ब ८१ करोड लगानीमा पोखरा खानेपानी सुधार आयोजना निर्माण सम्पन्न
पोखरेलीलाई अझै पानीकै अभाव
मंसिर १५, २०८१ शनिबार ९:५९:९
पोखरा : पोखरेलीको घर घरका धारामा मिनरल वाटरको जस्तै शुद्ध पिउने पानी पुर्याउने उद्देश्यका साथ २०७६ देखि सुरु भएको पोखरा खानेपानी सुधार आयोजना निर्माण सम्पन्न भएको छ ।
जापान अन्तर्राष्ट्रिय सहयोग नियोग (जाइका) को ४ अर्ब ८१ करोड रुपैयाँ अनुदानमा सुरु भएको आयोजना शुक्रबार हस्तान्तरण भएको हो । २०७३ फागुन ४ मा जाइका र नेपाल सरकारबीच आयोजनाका लागि अनुदान सम्झौता भएर २०७६ बाट आयोजनाको काम सुरु भएको थियो ।
जापानको हाज्मा एन्ड कपंरिसनले आयोजना निर्माणको जिम्मा पाएको थियो । कोभिडका कारण काम रोकीएपछि २०८० पुस १५ मा आयोजनाको म्याद सकिएपछि २०८१ भदौ १५ सम्मका लागि म्याद थप भएको थियो । आयोजना सम्पन्न भएसंगै माछापुच्छ्रे गाउँपालिकाको मर्दी खोलाबाट ५ सय र ४ सय एमएमको पाइपबाट संकलित ४ करोड १० लाख लिटरल पानी शुद्ध र सुरक्षित ट्रिटमेन्ट प्लान्टले प्रशोधन गरी पोखरामा वितरण गरिएको छ । यसअघि यही खोलाबाट दैनिक ४ करोड ६० लाख लिटर पानी प्रशोधन नगरी वितरण हुँदै आएकोमा ५० लाख लिटर कम पानी ट्रिटमेन्ट प्लान्टले प्रशोधन भएको हो । यसमा पहिलेको डिजाइन नै कम भएकोले त्यसै अनुसार काम भएको आयोजनाले जनाएको छ ।
शुद्ध र सुरक्षित खानेपानी ट्रिटमेन्ट प्लान्टले प्रशोधन गरी पोखरामा वितरण गरिए पनि पोखरामा पानीको अभाव भने रही नै रहेको छ । खानेपानी संस्थानले ५२ हजार घर धुरीलाई पानी वितरण गरेको छ । बोरिङ समेत गरी ६ करोड २० लाख लिटर प्रोडक्सन हुने गरेको खानेपानी संस्थान पोखरा शाखाका प्रमुख आशीष कार्कीले बताए ।
बढ्दो जनसंख्यालाई पनि ख्याल गर्दै आवश्यक ८ करोड ७० लाख लिटर दैनिक खानेपानी पोखराका १९ वटा वडालाई आवश्यक रहेको खोनपानी संस्थान पोखराले जनाएको छ । आयोजना निर्माण हुँदा बढ्दो जनसंख्यालाई समेत ख्याल गरी नबनाउँदा पानीको अभाव भने कायमै रहेको हो ।
खानेपानी मन्त्री प्रदीप यादवले शुक्रबार आयोजनाको उद्घाटन गर्दै थप पानीको समस्या पनि समाधान हुने गरी काम अघि बढ्ने बताए । पोखरा महानगरपालिकाका मेयर धनरा आचार्यले पहिलोपटक शुद्ध र सुरक्षित खानेपानी ट्रिटमेन्ट प्लान्टले प्रशोधन गरी पोखरा वितरण भएकोमा खुशी व्यक्त गरे । पानीको अभाव समाधान गर्ने गरी नयाँ योजना पनि अघि बढाउन उनले अनुरोध गरे । यसका लागि महानगरले आवश्यक सहयोग गर्ने पनि उनले बताए ।
पोखरामा खानेपानीको आपूर्ति मर्दीखोलाको साथै पोखरा १६ अर्मलास्थि भोटिखोलाबाट बर्खामा ३५ लाख र सुख्खा याममा १० लाख लिटर, कालिमुडा, माझकुन मुहानबाट बर्खामा ३५ लाख र सुख्खामा १५ लाख लिटर पानी दैनिक उत्पादन भएर अमलाबिसौनी ट्याँकीमार्फत वितरण हुँदै आएको छ । बालधारामार्फत १० लाख लिटर पानी वितरण हुन्छ । त्यसबाहेक विभिन्न स्थानमा रहेका २१ वटा बोरिङबाट पनि खानेपानी निकालेर पोखरामा वितरण हुँदै आएको हो । सबैखोला र बोरिङसमेत गरेर कुल दैनिक ६ करोड २० लाख पानी संकलन गरी वितरण हुँदै आएको खानेपानी संस्थानले जनाएको छ ।
पोखरामा पानीको अभाव कम गर्न खानेपानी संस्थानको लगानीमा मर्दी खोलाबाट थप ५ सय एमएमको पाइपबाटपानी ल्याएर प्रशोधन गर्ने काम ठेक्का प्रक्रियामा गएको पनि खानेपानी संस्थान पोखरा शाखाका प्रमुख आशीष कार्कीले बताए । पोखराबासीले २४ घण्टा शुद्ध खानेपानीको सुविधा पाउन भने अझै केही वर्ष कुर्नु पर्ने देखिन्छ ।
प्रतिक्रिया दिनुहोस !
