आशा गरौं यहाँ चिकित्साशास्त्रको पढाइको विस्तारले मधेसवासीको स्वास्थ्य सूचकहरूमा पनि उल्लेखनीय परिवर्तनहरू ल्याओस् ।
डाक्टरी अर्थात् चिकित्साशास्त्र पढाइको प्रवेश परीक्षामा नेपालमा बर्सेनि दसौं हजार विद्यार्थी सहभागी हुन्छन् । तीमध्ये चार हजारभन्दा बढीले न्यूनतम उत्तीर्ण अंक ल्याउँछन् । तर पनि उत्तीर्ण सबैले पढ्न पाउँदैनन् । कारण के भने नेपालमा झन्डै दुई दर्जन शिक्षण अस्पतालसहितका कलेजमा चिकित्साशास्त्रको स्नातक तह पढाइ हुन्छ । तिनले पढाउन सक्ने विद्यार्थीको क्षमताचाहिँ २१ सयको हाराहारीमा छ । जसको कोटा निर्धारण चिकित्सा शिक्षा आयोगले गर्छ ।
सुखद कुरा के भने पछिल्लो समय विद्यार्थीका लागि अवसरको दैलो अलि फराकिलो गरी उघ्रिँदै आएको छ । कोटा थपिँदै छ । यसै वर्ष पनि सरकारले काठमाडौंबाहेक पोखरा, दाङ, जनकपुरलगायत ठाउँका कलेजमा चिकित्साशास्त्रको पढाइ विस्तार ग¥यो । सबैभन्दा धेरै खुसीको कुरा त दुर्गम कर्णाली स्वास्थ्य विज्ञान प्रतिष्ठानमा चिकित्साशास्त्रको पढाइ सुरु भइसकेको छ र यसपालि मधेस स्वास्थ्य विज्ञान प्रतिष्ठानमा पनि सुरु भयो ।
मधेसमा चिकित्साशास्त्रको स्नातक अर्थात् एमबीबीएसको पढाइ सुरु हुनु भनेको मधेसका लागि त सुखद हुँदै हो, देशकै लागि उत्साहपूर्ण छ । किनभने त्यहाँ देशैभरिका विद्यार्थीले पढ्ने अवसर पाउँछन् । मधेस स्वयंले डाक्टर उत्पादन गर्छ न कि बिरामी भएर उपचारका लागि राजधानी काठमाडौं वा अन्त भौंतारिन्छ भन्ने सकारात्मक सन्देश यसले प्रवाह गरेको छ । मधेसको शिर उचो बनाएको छ । चिकित्सा शिक्षा आयोगले ५० सिट निर्धारण गरेसँगै सुरु मधेसमा यसपालिदेखि डाक्टरी पढाइ सुरु भयो । ती ५० सिटमा पनि ७५ प्रतिशत चाहिँ छात्रवृत्तिका हुन् । निजी क्षेत्रको कलेजमा यसअघि पनि मधेसमा चिकित्साशास्त्र पढाइ नभएको होइन, सरकारी सेवाको विस्तार चाहिँ महत्वपूर्ण कदमका रूपमा आएको छ ।
जहाँ पढाइ हुन्छ, त्यहाँ उपचार पनि । यसबाट मधेसवासीले थप र गुणस्तरीय स्वास्थ्य सेवाको अवसर पनि प्राप्त गर्ने विश्वास गर्न सकिन्छ । धार्मिक नगरी जनकपुरधामलाई शिक्षाको हबका रूपमा विकास गर्न पनि चिकित्साशास्त्रको पढाइले मद्दत पुग्ने विश्वास गर्न सकिन्छ । मधेस प्रदेश, नेपालको सात प्रदेशहरूमध्ये एक हो, जसले शिक्षा र स्वास्थ्य क्षेत्रमा उल्लेखनीय चुनौतीहरूको सामना गरिरहेको छ । तसर्थ चिकित्साशास्त्रको पढाइको विस्तारलाई एउटा उपलब्धिका रूपमा लिन सकिन्छ । आशा गरौं यहाँ चिकित्साशास्त्रको पढाइको विस्तारले मधेसवासीको स्वास्थ्य सूचकहरूमा पनि उल्लेखनीय परिवर्तनहरू ल्याओस् ।
प्रतिक्रिया दिनुहोस !
