अनुसन्धानका लागि एक बालकसहित तीनजना प्रहरी नियन्त्रणमा, विज्ञ टोली आउँदै

अछाम : ढकारी गाउँपालिकामा फुपू -भदै मृत्यु प्रकरणमा प्रहरीले हालसम्म तीनजनालाई नियन्त्रणमा लिएको बताएको छ । प्रहरीले सोमबार साँझ सोधपुछका लागि एक बालकलाई  समेत नियन्त्रणमा लिएको हो । यसअघि प्रहरीले आइतबार दुईजनालाई नियन्त्रणमा लिएको थियो । प्रहरीले नियन्त्रणमा लिएका तीनजना ढकारी १ र ३ का हुन् । 

प्रहरीले सोमबार अन्दाजी ११ वर्षीया बालकलाई सोधपुछका लागि मंगलसेन ल्याएको प्रहरी नायब उपरीक्षक डीएसपी ईश्वरी प्रसाद भण्डारीले जानकारी दिए । घटनाको विषयमा हालसम्म बालकसहित तीनजनालाई नियन्त्रणमा लिएको उनले बताए । उनले भने,'अहिलेसम्म बालकसहित तीनजनालाई सोधपुछका लागि ल्याएका छौं । बालकलाई मंगलसेन ल्याउँदा उनको अभिभावक बुवा पनि सँगै आएका छन् ।’ 

स्रोतका अनुसार घटनाको प्रत्यक्षदर्शी ११ वर्षीया बालक रहेको बताइएको छ । घटनाको विषयमा थप अनुसन्धानमा सहयोग गर्न प्रदेश प्रहरी कार्यालय धनगढीबाट प्रहरीको टोली अछाम आउने भण्डारीले बताए । उनले भने,‘घटनाको विषयमा निकै सुक्ष्म तरिकाले अनुसन्धान गरिरहेका छौं । अनुसन्धानका लागि थप सहयोग चाहिएकाले  विज्ञ टोली अछाम आउँदैछ ।’

नेपालगञ्जमा दुवैको शव पोष्टमार्टमपछि र आजै शव लिएर अछाम फर्किएको मृतकका आफन्त रमेश भण्डारीले जानकारी दिए । 

शुक्रबार सम्पर्कविहीन भएका इसरा र सरस्वति शनिबार छिन्ने ओढार जंगलमा मृत अवस्थामा भेटिएका थिए । दुवैजनाको शव १५ मिटरको दुरीमा रहेको थियो । मृतक दुवै कमलबजार नगरपालिकाको विद्या प्रवोधनी मावि कक्षा ८ मा  छात्रा हुन्।