राजतन्त्र फर्काउने नाममा हिंसात्मक र आपराधिक गतिविधि गर्नेलाई कारबाही गरियोस् : उपेन्द्र यादव
चैत १८, २०८१ सोमबार १६:१९:३०
काठमाडौं : जनता समाजवादी पार्टीका अध्यक्ष उपेन्द्र यादवले चैत १५ गतेको काठमाडौंको तीनकुनेको घटना आपराधिक भएको बताएका छन्। सोमबार भक्तपुरमा आयोजित कार्यक्रममा उनले लोकतन्त्रमा सबैले आ-आफ्नो विचार राख्न र बोल्न पाउने भए पनि त्यस दिनको उग्र गतिविधि अपराध गर्ने मानसिकताबाट ग्रसित भएको बताए।
राजतन्त्र फर्काउने नाममा भएको हत्या, आगजनी र तोडफोडले लोकन्तान्त्रिक पद्धतिको खिल्ली उडाएको र त्यसदिनको सम्पूर्ण गतिविधि हिंसात्मक र आपराधिक रहेकाले दोषीलाई कारबाहीको दायरामा ल्याउनुपर्ने उनले बताए।
सरकार संसद् र सिंहदरबारमा मजबुत रहे पनि जनतामाझ कमजोर रहेको यादवको भनाइ छ। यादवले बिचौलिया, भ्रष्ट र कमिसनखोरको बिगबिगीकै कारण नेपाल सरकारप्रति जनता रुष्ट रहेको बताए। राजनीतिक दलहरूले बेलैमा सुधारतर्फ ध्यान दिन नसके देशको अवस्था झनै दयनीय बन्ने यादवले बताए।
प्रतिक्रिया दिनुहोस !
