चिनियाँ दूतावासले आफ्ना नागरिकलाई भन्यो: नेपाल-भारत सीमामा नजानू, अनावश्यक तस्बिर पनि नखिच्नू

काठमाडौं : नेपालस्थित चिनियाँ दूतावासले नेपाल-भारत सीमा क्षेत्रमा नजान आफ्ना नागरिकलाई आग्रह गरेको छ। पर्साको वीरगन्ज नाका हुँदै रक्सौल छिरेका चार चिनियाँ नागरिकलाई भारतीय प्रहरीले पक्राउ गरेपछि चिनियाँ दूतावासले एडभाइजरी जारी गरेको हो। एडभाइजरीमा नेपाल-भारत सीमा क्षेत्रमा नजान दूतावासले आफ्ना नागरिकलाई सचेत गराएको हो।
 
अन्नपूर्णपोस्ट्ले बिहीबार आफ्नो अनलाइन संस्करणमा वीरगन्जबाट भारत छिरेका चार चिनियाँ नागरिक पक्राउ गरेको समाचार प्रकाशित गरेको थियो। त्यसको भोलिपल्टै दूतावासले भारत-पाकिस्तान तनावका कारण नेपाल-भारत सीमामा सुरक्षा जाँच कडा बनाइएकाले गल्तीले पनि त्यस क्षेत्रमा नजान आग्रह गरेको हो।

सीमा क्षेत्रमा गएर अनावश्यक तस्बिर नखिच्न पनि दूतावासले आग्रह गरेको छ। 'नेपाल र भारतको अध्यागमन र सीमा कानुन कडाईका साथ पालना गर्नुहोस्। अनावश्यक तस्बिर नखिच्नुहोस्,' दूतावासले भनेको छ।

नेपाली र भारतीय नागरिकहरू खुला सीमाका कारण बिना भिसा एकअर्काको मुलुकमा सहजै आवात जावत गर्नसक्ने तर चीनलगायत तेस्रो मुलुकका नागरिकहरूलाई त्यो सुविधा नभएको समेत चिनियाँ दूतावासले भनेको छ। चिनियाँ दूतावासले स्थानीय टुरिस्ट गाइडको समेत भरोसा नगर्न आग्रह गरेको छ।

भारत अवैध आप्रवासीहरूप्रति कठोर रहेको र सजायसमेत हुने भएकाले सचेत रहन आफ्ना नागरिकलाई दूतावासले आग्रह गरेको छ।  अवैधरूपमा भारत प्रवेश गरे २ देखि ८ वर्षसम्म सजाय हुनसक्ने समेत दूतावासले आफ्ना नागरिकलाई सचेत गराएको हो। भारत जान इच्छुकहरूले नेपालबाटै भिसा आवेदन दिनसक्ने दूतावासले बताएको छ।