गोरखा : हिमालय मावि बारपाकको प्रवेशद्वारमा मंगलबार बिहान साढे नौ बजे सन्तकुमारी घले मिस, मीनाकुमारी घले मिस र दीपेन्द्र बानियाँ सर दुवै हात जोडेर नमस्कार गर्दै उभिरहेका थिए ।
सानासाना बालबालिकाहरू किताब, कापीले भरिएको झोला बोकेर धमाधम आउँदै थिए । सर, मिसहरूले हँसिलो मुहारमा गुडमर्निङ, नमस्कार, अनि स्थानीय भाषामा स्योपो ख्याङ भनिरहेका थिए । विद्यार्थीहरू हाँस्दै ‘गुडमर्निङ, स्योपो ख्याङ, नमस्कार, ढोगदिया’ भन्दै विद्यालय प्रवेश गर्दै थिए । शिक्षक, विद्यार्थीको यो सुन्दर दृश्य छोराछोरी पुर्याउन स्कुल गेटसम्म आएका अभिभावकहरू दंग पर्दै हेरिरहेका थिए ।
यस वर्षदेखि विद्यालयले सुरु गरेको यो सुन्दर परम्परासँग उनीहरू पुलकित थिए । भूकम्पको केन्द्रबिन्दु भनेर नाम चलेको बारपाकको हिमालय माविले गत वैशाखको २० गतेदेखि विद्यार्थीलाई न्यानो स्वागत गर्ने परम्परा सुरु गरेको हो ।
‘१९ गतेको स्टाफ बैठकले निर्णय गरेर २० गतेबाट हामीले विद्यार्थीलाई स्वागत गर्न सुरु गरेका हौं’, प्रधानाध्यापक राम उद्गार महतोले भने, ‘हामी २४ जना शिक्षक स्टाफ छौं । प्रत्येक दिन दुई–दुई जना सर, मिसहरू मूलगेटको दायाँ–बायाँ उभिनुहुन्छ अनि, गुडमर्निङ, नमस्कार अनि स्थानीय भाषाबाट स्योपो ख्याङ भन्नुहुन्छ, ‘यसरी मुस्कानसहित स्वागत गरेपछि विद्यार्थी पनि अति नै खुसी भएको देखियो । अभिभावक पनि खुसी हुनुहुन्छ । बारपाक भ्रमणमा आएका विदेशी पर्यटकहरू पनि मुस्कानसहितको स्वागत देखेर रोमाञ्चित हुने गरेका छन् । केही दिनअघि शिक्षा मन्त्रालयबाट सरहरू विद्यालयको अनुगमनमा आउनुभएको थियो । उहाँहरू पनि नौलो परम्परा देखेर धेरै खुसी हुनुभयो । हामीलाई धन्यवाद दिनुभयो ।’
यही परम्परा केही वर्षअघि विद्यालय व्यवस्थापन समितिले विद्यार्थीमार्फत सुरु गरेको थियो । तर, त्यतिबेला विद्यार्थीहरूले निरन्तरता नदिएका कारण एक महिनापछि बन्द भएको एक शिक्षक सलिना गुरुङले बताइन् । यसपटक भने सबै शिक्षकले अपनत्व लिएकाले निरन्तरता पाउने विश्वास लिइएको उनले बताइन् । विद्यार्थी मैत्री वातावरण देखेपछि यसपटक ५१ जना नयाँ विद्यार्थी भर्ना भएका विद्यालयले जनाएको छ । गतवर्ष जम्मा सात जना नयाँ भर्ना भएको यहाँ यस वर्ष बोर्डिङ स्कुलबाट पनि सामुदायिक विद्यालयमा भर्ना हुन आएको उनले बताए ।
प्रतिक्रिया दिनुहोस !
