अछाम :साँफेबगर मेल्लेख (साँफे–नन्देगडा–मेल्लेख–षोडशा–ऋषिदह) सडक स्तरोन्नतिको काम ५ महिनादेखि ठप्प छ । साँफेबगर नगरपालिका र मेल्लेख गाउँपालिकालाई जोड्ने मुख्य सडक स्तरोन्नतिको काम रोकिएको ५ महिनाभन्दा बढी भयो । ठेकेदार सम्पर्कविहीन छन् ।
दश किलोमिटर सडक स्तरोन्नतिको कामको जिम्मा ललितपुर इमाडोलको नाति कन्स्ट्रक्सन प्रालिले पाएको थियो । नातिले पूर्वाधार विकास कार्यालय अछामसँग २०८१ असार १५ गते काम सम्पन्न गर्ने गरी २०७९ असार ६ गते भ्याटसहित १३ करोड २८ लाख १० हजार २०८ सम्झौता गरेको थियो । सुदूरपश्चिम प्रदेश भौतिक पूर्वाधार विकास मन्त्रालयको क्रमागत योजनाअन्तर्गत उक्त सडक स्तरोन्नतिको पूर्वाधार विकास कार्यालय अछामका इन्जिनियर दीपेन्द्र थापाले जानकारी दिए । पहिलोपटक २०८१ पुस २९ सम्म म्याद थप गरिएको र दोस्रोपटक म्याद थपका लागि फाइल मन्त्रालयमा पठाएको इन्जिनियर थापाले बताए ।
उनले भने, ‘सम्झौता मितिमा काम सम्पन्न भएन, पहिलोपटक २०८१ पुससम्म र अब दोस्रोपटक म्याद थपका लागि फाइल पठाएका छौं । ठेकेदारले रकम अभावका कारण काम गर्न नसकेको भन्दै आएको छ । अब सायद म्याद थप भएर आउँछ होला ।’ ठेकेदारले बैंक ग्यारेन्टी, बिमाका लागि समेत पैसा नभएको बताउँदै आएको थापाले बताए । असार सडकको केही नाली व्यवस्थापनको काम भए मात्र पनि वर्षाको पानीले सडक धेरै बिग्रनबाट जोगिने थापाले बताए ।
सडक स्तरोन्नतिअन्तर्गत सडकका नाली निर्माण र ग्राभेल हुनेछ । हालसम्म ठेकेदारले ९ करोड १५ लाख ७६ हजार ९७८ रुपैयाँ भुक्तानी लिएको कार्यालयले जनाएको छ । अब बाँकी ४ करोड १२ लाख ३३ हजार २३० भुक्तानी रहेको छ । पूर्वाधार विकास कार्यालयका लेखाअधिकृत नयनबहादुर बुढाका अनुसार २०७९/८० मा ४ करोड ३७ लाख ८५ हजार ७७२, ०८०/८१ मा ३ करोड १८ लाख १२ हजार ७७७ र ०८१/८२ मा १ करोड ५९ लाख ७८ हजार ४२८ रुपैयाँ भुक्तानी भएको छ ।
पूर्वाधार विकास कार्यालय अछामका प्रमुख जंगबहादुर थापाले कार्यालयसँग सडकका लागि बजेट अभाव नरहेको बताए । उनले भने, ‘कार्यालयसँग बजेट छ, बजेट अभाव त हुँदै होइन । ठेकेदारले लगानी गर्ने पैसा नै छैन भन्छ । ठेकेदार लगानीका लागि पैसा छैन भन्दै पन्छिने गरेको छ । धेरैपटक ताकेता गरेका छौं । जसरी हुन्छ काम सुरु गर्नुस् भनेका छौं । म्याद थपको प्रक्रिया भइरहेको छ ।’ ठेकेदारले विभिन्न बहानामा आलटाल गर्ने गरेको थापाले बताए ।
ठेकेदारको लापरबाहीका कारण साँफेबगरका यस्ता थुप्रै योजनाहरू लथालिंग अवस्थामा रहेको साँफेबगर नगरपालिकाका मेयर राजेन्द्रबहादुर कुँवरले बताए । योजनाहरू अलपत्र पारेर ठेकेदारहरू सम्पर्कविहीन रहेको बताउँदै पटक–पटक तोकेता गर्दा समेत ठेकेदारहरूले नमानेको मेयर कुँवरको भनाइ छ । उनले भने, ‘वर्षायाम सुरु भइसक्यो, यस्ता निर्माणधीन सडकले झनै जोखिम बढाएको छ । यो वर्षको वर्षायाममा बढी पानी पर्ने भन्ने अनुमान छ । बढी जस्तो बाढी पहिरोको जोखिम यस्ता बन्दै गरेका सडकहरूले निम्त्याएका छन् ।’
साँफे–मेल्लेख सडक छेउमा आम नागरिकलाई जानकारीका लागि राखिएको बोर्डमा सूचनासमेत अधुरै राखिएको छ । बोर्डमा सडकको स्तरोन्नतिको लागत बजेट उल्लेख गरिएको छैन ।
प्रतिक्रिया दिनुहोस !
