बैतडी : बैतडीको पाटन नगरपालिकामा नेकपा एमालेले घेरबार लगाएको छ। नगरपालिकामा भएको अनियमितताका विषयमा छानबिनको माग गर्दै विरोध स्वरूप झिकडे कार्यक्रमअन्तर्गत नगरपालिकाको कार्यालयमा घङारुको ‘झिकडे बार’ लगाएको हो।
यसअघि लेखा शाखामा उपप्रमुख कमल सिंह बोहराको नेतृत्वमा तालाबन्दी गर्दै उठाएका मागहरूमाथि छानबिन गरिनुपर्ने भन्दै ‘झिकडे आन्दोलन’ गरिएको जनाइएको छ। एमालेले नगरपालिकाको मूल गेट र भित्री गेटमा झिकडाको बार नै लगाएर आन्दोलन गरेको हो।
नगरपालिकामा भएका भनिएका अनियमितताका विषयमा छानबिन गर्नुपर्ने र दोषीलाई कारबाही गर्नुपर्ने माग अघि सार्दै विरोधमा उत्रनु परेको एमाले नगर कमिटी अध्यक्ष धर्मराज भट्टले जानकारी दिए। पालिकामा विषय उठ्दा पनि नगर प्रमुख समेत उपस्थित नहुनु अर्को दुःखद कुरा भएको एमाले नगर कमिटीको ठहर छ। नगरपालिकामा भएको भनिएका अनियमितताका कार्यक्रमहरूका विषय उल्लेख नै गरेर छानबिन हुनुपर्ने माग राखेको छ।
यसअघि पाटन नगर कमिटी अध्यक्ष धर्मराज भट्टको अध्यक्षतामा बसेको नगर कमिटीको बैठकबाट विरोधका कार्यक्रम सञ्चालन गर्ने निर्णय गरिएको थियो। आइतबार पाटन नगरपालिकाको कार्यालयको गेटमा घेरबार गर्ने निर्णय गरिएका हो। त्यसैगरी पाटनमा भएको भनिएको अनियमितताका विषयमा छानबिन गर्न सम्बन्धित निकायसँग लगातार दबाब दिने पनि निर्णय गरिएको थियो। बैठकमा सहभागी प्रतिनिधिहरूले पाटनको छानबिन प्रक्रियालाई टुङ्गोमा नपुर्याएसम्म पछि हट्न नहुने बताएका थिए।
यही असार २६ गते पाटन नगरपालिकाको लेखा शाखामा तालाबन्दी गरिएको थियो। उपप्रमुख कमलसिंह बोहराको नेतृत्वमा आर्थिक अनियमितता भएको भन्दै लेखा शाखामा तालाबन्दी गरिएको हो। बिना कागजात भुक्तानी भएको, काम सम्पन्न नभइकनै भुक्तानी दिइएको र अन्य विविध विषयमा अनियमितता भएको भन्दै लेखा शाखामा ताला लगाएका थिए। त्यसै दिन नगर उपप्रमुख गौरी सिंह रावलले तालाबन्दी खोलेर आवश्यक सहजीकरण गरिदिन माग गर्दै जिल्ला समन्वय समिति समक्ष पत्र पठाएका थिए।
त्यसको भोलिपल्ट जिल्ला समन्वय समितिको कार्यालयमा समन्वय प्रमुख खगेन्द्र धामी, उपप्रमुख दमन कुँवर, पाटन नगरपालिकाका उपप्रमुख कमल सिंह बोहरा, कार्यकारी नारायण बिष्ट लगायतका प्रतिनिधि सहभागी भएर नगर प्रमुख रावल भारत भ्रमणबाट फर्किए लगत्तै छानबिन समिति बनाउने सहमति गर्दै ताला खोल्ने सहमति भएको थियो।
त्यस बीचमा नेकपा एमाले, नेपाली काङ्ग्रेस र माओवादी केन्द्रको नगर कमिटीबाट यसविषयमा छानबिन गरिनुपर्ने भन्दै विज्ञप्तिमा नै जारी भएको थियो। सार्वजनिक गरिएका विज्ञप्तिमा उपप्रमुख बोहराले उठाएका मागका विषयमा छानबिन गरिनुपर्ने धारणा थियो।
एमालेले भने प्रमुख जिल्ला अधिकारीलाई समेत ध्यानाकर्षण जनाउँदै छानबिन गर्नुपर्ने भन्दै ज्ञापन पत्र नै बुझाएको थियो। त्यसपछि असार २९ गते प्रमुख जिल्ला अधिकारी, जिल्ला समन्वय समिति प्रमुख, उपप्रमुख, पाटन नगरपालिकाका उपप्रमुख सहितका केही जनप्रतिनिधि सहभागी भएर जिल्लामा भएको सहमति अनुरूप ताला खोल्ने धारणा आएको थियो।
सोही समयमा नगरपालिकामा उपस्थित भएका विभिन्न राजनीतिक दलका प्रमुख एवं प्रतिनिधिहरू पनि सहभागी रहेको र उनीहरूलाई पनि बोलाएर छलफल गरि अघि बढ्नुपर्ने माग उठेको थियो। तर प्रमुख जिल्ला अधिकारी उक्त छलफलमा सहभागी भएनन्। नगर उपप्रमुख बोहरा पनि केही समय मात्रै बसेर बाहिरिए।
त्यसपछि उपप्रमुखको अनुपस्थितिमा बसेको छलफलबाट लेखाको ताला खोलेर सहज वातावरण बनाउने समझदारी भएको थियो। नगरउपप्रमुख बोहरा आफूहरूको छलफलमा सहभागी नभएको भन्दै उपप्रमुखकै कार्यकक्षमा तालाबन्दी गरिएको थियो। त्यसयतादेखि उक्त ताला खुलेको छैन।
प्रतिक्रिया दिनुहोस !
