कोहली र रोहितको एकदिवसीय करियर सकिएको हो ? विश्वकपमा स्थान पाउन गाह्रो
साउन २१, २०८२ बुधबार ८:८:५०
काठमाडौं : एन्डरसन–तेन्डुलकर ट्रफीमा इङ्ग्ल्याण्डलाई २–२ को बराबरीमा रोकेर भारतले नयाँ पुस्ताका खेलाडी चुनौतीसँग डराउँदैनन् भन्ने देखाएको छ।
मोहम्मद सिराजले करिब २०० ओभर बलिङ गरेर ५ टेस्टमा आफ्नो थकित शरीरलाई व्यवस्थापन गर्दै टोलीलाई बलियो बनाए। वाशिंगटन सुन्दरले हरेक अवसरमा जिम्मेवारी लिएका देखिए। आवश्यक पर्दा यशस्वी जयस्वालले उत्कृष्ट योगदान दिए। आकाश दीप र प्रसिद्ध कृष्णले प्रभाव पारे। साई सुदर्शनले भविष्यमा उपयोगी खेलाडी बन्ने झलक पनि देखाए।
विराट कोहली, रोहित शर्मा र जसप्रीत बुमराहको भविष्य के हुन्छ ?
कोहली (३६) र रोहित (३८) ले टी–२० र टेस्ट क्रिकेटबाट सन्न्यास लिइसकेका छन्। अब उनीहरू एकदिवसीय र आईपीएलमा मात्र खेल्ने छन्। उनीहरूले सम्भवतः अष्ट्रेलियामा हुने ३ खेलको एकदिवसीय शृङ्खला र त्यसपछि घरेलु मैदानमा दक्षिण अफ्रिकाविरुद्ध हुने ३ खेलको एकदिवसीय शृङ्खला खेल्नेछन्।
यसपछि दुवैले जनवरी–जुलाई २०२६ को बीचमा न्युजिल्याण्ड र इङ्गल्याण्डविरुद्ध ६ एकदिवसीय खेल खेल्ने मौका पाउनेछन्।
रोहित–कोहली दुई वर्षसम्म खेल्नेछन् ?
बीसीसीआई स्रोतले पीटीआईलाई भन्यो, ‘यसबारे चाँडै छलफल हुनेछ। २०२७ को विश्वकप हुन अझै दुई वर्षभन्दा बढी समय बाँकी छ। त्यतिन्जेलसम्म कोहली र रोहित करिब ४० वर्षका हुनेछन्। हामीले स्पष्ट रणनीति बनाउनु पर्छ र युवालाई अवसर पनि दिनुपर्छ।’
२०२४ को टी–२० विश्वकप जितेपछि दुवै खेलाडीले यस ढाँचाबाट सन्न्यास लिए। तर कुनै पनि धूमधाम बिना उनीहरुले टेस्ट क्रिकेटलाई बिदाई गरे। अब प्रश्न यो छ कि के उनीहरू आफ्नो अवकाशको समय आफैंले तय गर्ने छन् वा बोर्डले बिस्तारै टोलीबाट बाहिर निकाल्नेछ ?
स्रोतले भन्यो, ‘कोहली र रोहितले भारतका लागि धेरै गरेका छन्। त्यसैले उनीहरूमाथि कुनै दबाब हुनेछैन। तर अर्को एकदिवसीय चक्र सुरु हुनुभन्दा पहिले उनीहरूसँग मानसिक र शारीरिक रूपमा कहाँ उभिएको महसुस गर्छन् भन्ने बारेमा निश्चित रूपमा कुराकानी हुनेछ।’
कोहली र रोहितले यस वर्ष मार्चमा च्याम्पियन्स ट्रफी पछि कुनै पनि अन्तर्राष्ट्रिय खेल खेलेका छैनन्।
बीसीसीआईको नियम अनुसार कुनै खेलाडी फिट छ भने उसले घरेलु क्रिकेट खेल्नुपर्छ। यदि उसले खेलेन भने टोलीबाट बाहिर निकाल्न सकिन्छ। यद्यपि कोहली र रोहित जस्ता ठूला खेलाडीलाई यसबाट छुट दिन सकिन्छ।
अब बुमराहको के हुन्छ ?
बुमराहको मामला फरक छ। उनको फिटनेस र कार्यभारलाई ध्यानमा राखेर योजना बनाइएको छ। उनलाई इङ्गल्याण्डमा केवल ३ टेस्ट खेल्न भनिएको थियो। बोर्ड र व्यवस्थापनले अब बुमराहलाई सबै ढाँचामा खेल्न लगाउने कि एक वा दुई ढाँचामा मात्र ध्यान केन्द्रित गर्न लगाउने भन्ने बारेमा विचार गरिरहेको छ।
बुमराह नजिकका एक पूर्व खेलाडीले भने, ‘बुमराहको महत्वमा कुनै शंका छैन। तर हामीले उनलाई कसरी प्रयोग गर्ने भनेर निर्णय गर्नुपर्छ। सिराज, आकाश दीप र प्रसिद्ध जस्ता बलरले टेस्ट म्याच जित्न सक्छन् भनेर प्रमाणित गरेका छन्। हामीले उनीहरूलाई समर्थन गर्नुपर्छ।’
उनले बुमराले सीमित ओभरको क्रिकेटमा बढी ध्यान दिनुपर्ने बताए।
प्रतिक्रिया दिनुहोस !
