गोरखा : दूधपोखरी नुहाएर फर्कने क्रममा हराएका आमाछोराको मध्यरातमा उद्धार गरिएको छ। दूधपोखरीबाट फर्कने क्रममा जंगलमा हराएका ७७ वर्षीय नुना ढकाल र ५७ वर्षीय शिवहरि ढकाललाई राति १२:३० बजे उद्धार गरिएको गोरखाका एसपी भरत बिकले जानकारी दिए।
उनीहरुलाई स्थानीयवासीको सहयोगमा भच्चेकचौकीबाट खटिएका प्रहरी टोलीले माउनीडाँडा जंगलको बीचबाट उद्धार गरिएको प्रहरी निरीक्षक किरण घिमिरेले जानकारी दिए। भरतपुर महानगरपालिका-२ आँपटारीका उनीहरु जनैपूर्णिमाका अवसरमा दूधपोखरी नुहाउन र पूजाआजा गर्न गत २२ गते त्यसतर्फ गएका थिए।
‘अजिरकोट गाउँपालिका २ का वडाअध्यक्ष बाबुराम अधिकारी सरले उहाँहरु हराउनु भएको खबर हामीलाई राती १०:३० बजेतिर गराउनुभयो’, घिमिरेले भने, ‘उहाँहरुको फोन सम्पर्कचाहिँ भइरहेको थियो। स्थानीयवासी र हामी मिलेर उहाँहरुलाई खोजतलास गर्दा राती १२:३० तिर माउनीडाँडाको जंगलभित्र भेटिनु भयो।’
उनीहरूलाई मध्यरातमा बोकेर भच्चेक प्रहरी चौकीमा राखिएको र आइतबार बिहान आफन्तहरू झिकाएर जिम्मा लगाएर पठाइएको उनले बताए। उनीहरु ४४ सय मिटर उचाइमा रहेको दूधपोखरी पुग्न नसकी फर्कदा बाटो बिराएर हराएका प्रहरीले जनाएको छ।
प्रतिक्रिया दिनुहोस !
