हिमाली गाउँमा हेपाटाइटिस बीविरुद्धको खोप शिविर : तीनजनामा संक्रमण पुष्टि

गोरखा : हिमाली भेगमा अवस्थित बिही गाउँमा हेपाटाइटिस बी विरुद्धको खोप शिविर सुरू भएको छ । किमोलुङ फाउण्डेशन नेपालले गाउँपालिकासँग समन्वय गरी चुमनुब्री- ५ को राना खोपकेन्द्रमा खोप शिविर सुरु गरेको हो ।

बुधबारदेखि सुरू भएको शिविर वडा नं. ४ र ५ का विभिन्न खोपकेन्द्रहरूमा १० दिनसम्म सञ्चालन हुनेछ । शिविरको प्रदेश जनस्वास्थ्य कार्यालय गोरखाका खोप शाखा प्रमुख नानीबाबु दानी र संस्थाका संस्थापक अध्यक्ष वाङचुक राप्तेन लामाले संयुक्त रुपमा उद्घाटन गरे । 

पहिलो दिन ५८ जनामा स्क्रिनिङ गरिएको र ४४ जना लामाले जानकारी दिए । ३१ जना महिला र २७ जना पुरुषमा स्क्रिनिङ गरिएकामा तीनजना (दुई महिला र एक पुरुष)मा हेपाटाइटिस बीको संक्रमण पुष्टि भएको उनले बताए । १६ वर्ष मुनिका ११ जनामा गरिएको परीक्षणमा तीनजनामा हेपाटाइटिस बी संक्रमण पुष्टि भएको संस्थाका संस्थापक अध्यक्ष वाङचुक राप्तेन लामाले बताए । 

चुमनुब्री गाउँपालिका -५ का वडाअध्यक्ष काल्देन छेवाङ लामाको अध्यक्षता एवं प्रदेश जनस्वास्थ्य कार्यालयका खोप फोकल पर्शन नानीबाबु दानीको प्रमुख आतिथ्यतामा बुधबार शिविरको औपचारिक रुपमा उद्घाटन गरिएको थियो । 

बिहीबार बिही स्वास्थ्यचौकीमा खोप शिविर सञ्चालन हुनेछ । त्यस्तै साउन ३० गते क्य्राक गाउँमा, भदौ १ गते सेराङगुम्बामा र ३ गते पुनः बिही गाउँमा छुटेकाहरुलाई खोप लगाइने कार्यक्रम तय भएको छ । भदौ ४ गते वडा नं. ४ को छाक–क्वाकको स्वास्थ्य संस्था, ५ गते गाप नुब्री आधारभूत विद्यालाय, ६ र ७ गते प्रोक स्वास्थ्य संस्था, ८ गते नामरुङ ९लार्केबजार स्वास्थ्या चौकी र ९ गते गप वडा कार्यालयमा हुने जनाएको छ । शिविरमा आउने सबैको स्क्रिनिङ गर्ने भएता पनि हेपाटाइटिस ‘बी’ विरुद्धको खोप भने १६ वर्ष उमेर माथिका सबैलाई लगाइने बताए । हेपाटाइटिस ‘बी’ विरुद्धको खोप तीन डोज लगाउनुपर्ने हुन्छ । पहिलो खोप र दोस्रो खोप एक महिना पछि र अन्तिम खोप ६ महिना पछि लगाउनुपर्ने संस्थाका अध्यक्ष लामाले जानकारी दिए ।

हिमाली तथा उच्च पहाडी भेगका मनिसमा हेपाटाइटिस ‘बी’ को संक्रमण बढि मात्रमा देखिन थालेकाले शिविर गरिएको उनको भनाइ छ । वैदेशिक रोजगारीमा जाने क्रममा गरिने स्वास्थ्य परीक्षणको क्रममा त्यहाँका स्थानीयमा बढी मात्रामा हेपाटाइटिस ‘बी’ को संक्रमण देखिएर रोजगारीमा जान नपाउने गरेको अध्यक्ष लामाले बताए । त्यसको न्यूनीकरण गर्ने उद्देश्यले शिविर आयोजना गरिएको उनले बताए ।