चितवन : बीपी कोइराला मेमोरियल क्यान्सर अस्पतालमा बोनम्यारो प्रत्यारोपण केन्द्र निर्माण गर्न लागिएको छ । चीन सरकारको सहयोगमा अस्पतालमा बोनम्यारो प्रत्यारोपणका लागि अलग्गै युनिट बनाउन लागिएको हो ।
भवन निर्माण, उपकरण खरिद र जनशक्तिलाई तालिम दिने काम चीन सरकारले व्यवस्थापन गर्नेछ । यसका लागि चिनियाँ विशेषज्ञसहितको चिकित्सक टोलीले अस्पतालमा अनुगमन र अध्ययन थालेको छ । अस्पतालमा वातावरणीय मूल्यांकनको काम भइरहेको क्यान्सर अस्पतालले जनाएको छ । संरचना निर्माणदेखि चिकित्सकलाई सैद्धान्तिक र प्राविधिक तालिम दिन चीन सरकारले व्यवस्थापन गर्ने अस्पतालका कार्यकारी निर्देशक डा. शिवजी पौडेलले बताए ।
‘हामीले वातावरणीय प्रभाव मूल्यांकनको प्रतिवेदन बुझाएपछि चीन सरकारले काम थालनी गर्नेछ । अबको एक महिनाभित्र हामीले प्रतिवेदन बुझाउनेछौं,’ डा. पौडेलले भने, ‘हाम्रो तर्फबाट छिटो गरेका छौं । भवन निर्माण र उपकरण खरिद चीनले नै गर्ने भएको कारण बजेट र प्राविधिक पक्षमा ढिलाइ नहुने हुनाले समयमै काम पूरा हुने आशा गरेका छौं ।’
करिब ९ करोडको लागतमा चार कट्ठामा भवन बनाउन लागिएको हो । चिनियाँ टोलीले अबको एक साता अस्पतालको विभिन्न विभागको अनुगमन गर्नेछ । बोनम्यारो प्रत्यारोपणसँग सम्बन्धित आईसीयू, प्याथोलोजी, रेडियोलोजी, मेडिकल अंकोलोजीलगायतको सेवाको अवस्थाबारे अनुमगन गरेपछि त्यसको स्तरोन्नतिको आवश्यकताबारे सुझाव दिनेछन् ।
अस्पतालका अध्यक्ष डा. विजयराज न्यौपानेले सेवा सुरु भएपछि नेपाली बिरामीका लागि सहज हुने बताए । ‘पूर्वाधार निर्माणका लागि हाम्रो तर्फबाट सक्दो सहजीकरण गरेका छौं,’ उनले भने, ‘सकेसम्म छिटो सेवा दिने हाम्रो लक्ष्य हो ।’
सुरुवातमा चार शय्याबाट सेवा सुरु गरिनेछ । एउटा बिरामी २१ देखी २८ दिनसम्म अस्पतालमै राख्नुपर्छ । नेपालबाट उपचारका लागि महँगो शुल्क तिरेर भारत जानुपर्ने बाध्यता छ । नेपालमा बोनम्यारो प्रत्यारोपण गर्ने बिरामी वार्षिक ५० को हाराहारीमा छन् । अस्पतालका मेडिकल अंकोलोजी विभागका प्रमुख डा. गुरुशरण शाहले प्रत्यारोपण केन्द्र बनेपछि बिरामीलाई भारत जाने बाध्यता हट्ने बताए ।
‘कतिपय बिरामी खर्च अभावले अस्पताल नै आउँदैनन् । हामीले जतिसक्दो कम शुल्कमा सेवा दिने भन्नेमा छौं’, उनले भने,‘ यसका लागि स्रोत व्यवस्थापन हो । सरकारले केही गरे बिरामीलाई सुविधा हुन्थ्यो ।’
बोनम्यारो ट्रान्सप्लान्ट वार्ड परिजोजनाका लागि काम तीव्र पारिने चिनियाँ विशेषज्ञ टोलीका प्रमुख डा. चाओ गुइमिनले बताए । चीन–नेपाल मेडिकल सहयोगको एक विजर्डिसिपको रूपमा यस परियोजना २०२२ मा प्रस्ताव गरिएको हो ।
‘उच्च–गुणस्तर बोनम्यारो ट्रान्सप्लान्ट क्षमता निर्माण दक्षिण एसियाका बिरामीहरूको लागि ठूलो रणनीतिक महŒव राख्छ । हामी अनुभव आदानप्रदान, प्राविधिक मापदण्ड, कर्मचारी प्रशिक्षणसहित चीनको अनुभवलाई खुसीसाथ साझा गर्दछौं,’ उनले भने , ‘यो भ्रमणलाई हाम्रा दुई अस्पतालहरूको बीचमा साझेदारीलाई सुदृढ पार्न नयाँ सुरुवातको बिन्दुको रूपमा देखेका छौं । प्रत्यारोपण टेक्नोलोजीको लागि व्यावहारिक र कुशल तरिकासँगै काम गर्ने आशा गरेका छौं ।’
२०८१ वैशाख १३ गते स्वास्थ्य मन्त्रालयका सचिव डा. रोशन पोखरेल र चिनियाँ अन्तर्राष्ट्रिय विकास सहयोग संस्था (चाइना इन्टरनेसनल डेभलेपमेन्ट को–अपरेसन एजेन्सी) का प्रमुख लियू झाओ हुईले यससम्बन्धी सम्झौतामा गरेका थिए ।
प्रतिक्रिया दिनुहोस !
