झापा : झापाको दमकमा एक दम्पती सवार मोटरसाइकललाई ट्रकले ठक्कर दिँदा श्रीमतीको घटनास्थलमै मृत्यु भएको छ । दुर्घटनामा परी श्रीमान् घाइते भएका छन् । मंगलबार बिहान करिब ८ बजेतिर पूर्व -पश्चिम राजमार्गको दमक पशुहाट नजिकै दमकबाट पाडाजुँगीतर्फ आउँदै गरेको प्र१–०२–००२ ख०९१२ नम्बरको बन्दाकोपी बोकेको ट्रकले विपरीत दिशाबाट जाँदै गरेको प्र१–०१–०१२ प ९३१२ नम्बरको मोटरसाइकललाई ठक्कर दिएको थियो ।
ठक्करबाट दुर्घटनामा मोटरसाइकलको पछाडि सवार ४२ वर्षीया मुना गौतमको घटनास्थलमा मृत्यु भएको जिल्ला प्रहरी कार्यालय झापाले जनाएको छ । त्यस्तै दुर्घटनामा परी मोटरसाइकल चालक कमल गाउँपालिका–५ निवासी ४३ वर्षीय शुकदेव गौतम घाइते भएका छन् ।
मृतक मुना मोटरसाइकल चालक गौतमको श्रीमती हुन् । घाइते गौतमको बायाँ खुट्टामा सामान्य चोट लागेको छ । उनको दमक अस्पतालमा उपचार भइरहेको छ।
इलाका प्रहरी कार्यालय दमकले ट्रक चालक तेह्रथुम लालीगुराँस नगरपालिका–४ निवासी २५ वर्षीय आङ शेर्पासहित ट्रक र मोटरसाइकललाई नियन्त्रणमा लिएको छ ।
प्रतिक्रिया दिनुहोस !
