जनकपुरधाम : नख्खु कारागारबाट निस्केका जनकपुर बम काण्डका आरोपी सञ्जय साह (टकला) पुन ः कारागार नै फर्किएका छन् ।
बुधबार प्रदर्शनकारीले कारागारमा तोडफोड गर्न थालेपछि निस्केका साहले आफूलाई प्रहरीले हाजीर हुन भन्ने बित्तिकै कारागार फर्किने बताएका थिए । सोही अनुसार कारागार फर्किने क्रममा बिहीबार काभ्रेको मंगलटारमा उनी प्रहरी चेकजाँचको क्रममा इलाका प्रहरी कार्यालय भेटेपछि प्रहरीको नियन्त्रणमा पुगेको उनका समर्थक नविन यादवले बताएका छन् । ‘उनी आफै फर्किएका हुन् । कसैले पक्राउ गरेको होइन’, यादवले अन्नपूर्णसँग भने ।
पूर्वराज्यमन्त्री साहले जनकपुर बमकाण्डमा दोषी ठहर भई १२ वर्षदेखि जेल सजाय काटिरहेका थिए । तत्कालीन अवस्थामा मधेशी जनअधिकार फोरम र सद्भावना पार्टीका सांसद समेत रहेका साह जनकपुरकै मिडिया उद्यमी अरुण सिंहानियाको हत्याका आरोपी पनि हुन् ।
यता, मधेशका तीनवटा कारागारबाट ९८३ कैदी फरार भएको प्रहरीले जनाएको छ । सप्तरीको राजविराज, महोत्तरीको जलेश्वर र रौतहटको गौर कारागारबाट उनीहरू आन्दोलन, आगजनी र जेलनै तोडफोड गरेर भागेका हुन् ।
सप्तरीको राजविराज स्थित सप्तरी कारागारबाट फरार भएका २०५ कैदीमध्ये ३१ जनालाई प्रहरीले नियन्त्रणमा लिएको छ भने महोत्तरीको जलेश्वर कारागारबाट फरार भएका ५ सय ७५ कैदीमध्ये ३७ जना फर्किएको कारागारका सूचना अधिकारी रविन्द्र ठाकुरले जानकारी गराएका छन् ।
जलेश्वरमा फरार भएका २५ जना कैदी आफूखुशी फर्किएका हुन् भने भारतीय प्रहरीले पक्राउ गरेका फरार १२ जना कैदीबन्दीहरूलाई नेपाल प्रहरीलाई जिम्मा लगाइएको छ । दुवै देशको प्रहरी बिच समन्वय गरि महोत्तरीको भिठ्ठामोड सिमामा ९ जनालाई जिम्मा लगाईएको हो । ३ जनालाई मनराशिसवा १० स्थित बथनाहा चौकीको जिम्मा लगाईएको प्रहरीले जनाएको छ ।
त्यसैगरी गौर कारागारबाट २३३ कैदी फरार भएका हुन् । सर्लाहीको मलंगवा कारागारमा कैदीहरू जेलमा आगजनी गरेर भाग्न खोज्दा तीनवटै सुरक्षा निकायले कडा सुरक्षा व्यवस्था गरि रोकेको थियो ।
प्रतिक्रिया दिनुहोस !
