काठमाडौं : नेप्से परिसूचक एकल अंकले बढेर बन्द भएको छ। अघिल्लो कारोबार दिन मंगलबार ४२ अंकले ओरालो लागेको नेप्से परिसूचक यसदिन ५.३८ अंकले बढेर २७३१.८९ विन्दुमा अडिएको छ।
नेप्से सामान्य अंकले बढेपनि कारोबार रकममा भने मंगलबारको तुलनामा कमी आएको छ। यसदिन ३३४ स्क्रिप्सको २ करोड ३६ लाख १८ हजार १८६ कित्ता सेयर ११ अर्ब ४९ करोड ३९ लाख ८९ हजार १८५ रुपैयाँमा खरिदबिक्री भए। मंगलबार १४ अर्ब १६ करोड बराबरको सेयर कारोबार भएको थियो।
दुई कम्पनीको सेयर सकारात्मक सर्किट लेभलमा कारोबार हुँदा तीनवटा कम्पनीको सेयर ९ प्रतिशत बढीले वृद्धि भयो। कर्पोरेट डेभलपमेन्ट बैंक र आँखु खोला जलविद्युतको सेयर १० प्रतिशतले बढ्दा मिथिला लघुवित्त वित्तीय संस्था,पिपुल्स पावर र बुद्ध भूमि नेपाल हाइड्रोपावरको सेयर ९ प्रतिशत बढीले वृद्धि भयो।
कारोबार रकमका आधारमा आँखु खोला जलविद्युत कम्पनी शीर्षस्थानमा रह्यो। सो कम्पनीको ८३ करोड मूल्य बराबरको सेयर कारोबार भयो। राधी विद्युतले ५४ करोडको सेयर कारोबार गर्दा एसवाइ प्यानल नेपालले ४९ करोड,युनाइटेड मोदी हाइड्रोपावरले ४८ करोड र रिभर फल्स पावरले ३० करोड मूल्य बराबरको सेयर कारोबार गरे।
कारोबारमा आएकामध्ये १४१ वटा स्टक्सको मूल्य बढ्दा ११२ वटाको घट्यो। ७ स्टक्सको मूल्य भने स्थिर रह्यो। यसदिन ८ समूहको उपसूचक बढ्दा पाँच समूहको उपसूचक नकारात्मक देखिए।
प्रतिक्रिया दिनुहोस !
