झापा : झापा क्षेत्र नम्बर–५ मा राष्ट्रिय स्वतन्त्र पार्टी (रास्वपा) को सम्पर्क कार्यालय रहेको घरमा गए राति तोडफोड भएको छ । कमल गाउँपालिका–२ निवासी जयकुमार अधिकारीको दुई तले पक्की घरमा तोडफोड भएको जिल्ला प्रहरी कार्यालय झापाका डीएसपी खगेन्द्रबहादुर खड्काले जानकारी दिए।
उनका अनुसार माथिल्लो तलाको पूर्वतर्फ रास्वपाको सम्पर्क कार्यालय रहेको र दक्षिणतर्फ सो घरका मानिसहरू बसोबास गर्दै आएको कोठामा अपरिचित मानिसले ढुङ्गाले हानेर झ्यालको सीसा फुटाई दिएका छन् । ढुङ्गा प्रहारबाट एउटा झ्यालको सीसा फुटेको छ । रास्वपाको कार्यालयभित्र कुनै पनि भौतिक क्षति नभएको उनको भनाई छ । ढुङ्गा प्रहार गर्नेहरुको खोजी कार्य भइरहेको जनाइएको छ ।
आज बिहान ९ बजे प्रहरी चौकी तोपगाछीबाट प्रहरी सहायक निरीक्षक धनकुमार राईको टोली घटनास्थल पुगेका थिए । यो कार्यालय भएको घर कमल गाउँपालिका झापा–५ मा पर्छ । यो क्षेत्रबाट यस पटक काठमाडौँ महानगरपालिका पूर्व मेयर तथा रास्वपाका वरिष्ठ नेता बालेन्द्र शाह (बालेन) उम्मेदवार बनेका छन् ।
प्रतिक्रिया दिनुहोस !
