सिमराः बारा क्षेत्र नं. ४ बाट प्रतिनिधिसभा सदस्य पदको चुनाव लडेका ३७ मध्ये ३४ उम्मेदवारको जमानत जफत भएको छ। प्रतिनिधिसभा निर्वाचन निर्देशिका २०८२ को परिच्छेद १० बमोजिम सदर मतको १० प्रतिशत मत प्राप्त नगर्ने ३५ उम्मेदवारको जमानत जफत भएको हो।
प्रतिनिधिसभा सदस्य निर्वाचनमा १८ जनाले राजनीतिक दल र १९ जनाले स्वतन्त्र उम्मेदवारी दिएका थिए। जसमध्ये राष्ट्रिय स्वतन्त्र पार्टीका रहबर अंसारी, नेकपा एमालेका उम्मेदवार कृष्णकुमार श्रेष्ठ (किसान), जसपा नेपालका सन्जु साह कानुले मात्रै जमानत जोगाउन सफल भए।
मतगणनाअनुसार नेपाली कांग्रेसका उम्मेदवार श्यामबाबु गुप्ताले सात हजार एक सय १३, नेपाली कम्युनिस्ट पार्टी अजय कुशवाहाले दुई हजार ६७, राष्ट्रिय एकता दलका विनय यादवले एक हजार २६, आम जनता पार्टीका उमेश कुशवाहाले आठ सय ३३ मत, राष्ट्रिय प्रजातन्त्र पार्टी दिलीप शर्मा नेपालले आठ सय ९ मत, राष्ट्र निर्माण दल नेपालका समिम मियाले चार सय ८१ मत, राष्ट्रिय परिवर्तन पार्टीका सर्वेन्द्र खनालले चार सय ६४ मत पाएका थिए।
जनमत पार्टीका हसनजान मियाँले चार सय ३७, उज्यालो नेपालका सन्तोषकुमार गुप्ताले दुई सय २०, श्रम संस्कृति पार्टीका गोपालबहादुर खत्रीले एक सय ४४ मत, राष्ट्रिय जनमोर्चाकी सरस्वती उपाध्याले ५० मत प्राप्त गरेका थिए। तीन उम्मेदवारबाहेक अन्य सबैको जमानत जफत हुने निर्वाचन अधिकृत गम्भीर घिमिरेले जानकारी दिए।
प्रतिक्रिया दिनुहोस !
