चुनावको ‘मौका छोप्दै’ त्रिशूली किनारमा अवैध उत्खनन, प्रशासन मौन

धादिङ : धादिङको सिद्धलेक गाउँपालिका–६, परेवाटारमा सिङ्गो मुलुक प्रतिनिधि सभा निर्वाचनको परिणामको प्रतिक्षामा रहेको बेला, राजनीतिक व्यस्तता र प्रशासनिक ध्यान अन्यत्र मोडिएको मौका छोपी त्रिशूली नदी किनारमा अवैध नदीजन्य पदार्थको दोहन तीव्र बनेको छ ।

नेपाल सरकारको कानुन र सर्वोच्च अदालतको स्पष्ट आदेशअनुसार नदीको सतहमा मेशिन (डोजर वा स्काभेटर) प्रयोग गरी उत्खनन गर्नु पूर्णतः निषेध गरिएको छ । तर, सिद्धलेक गाउँपालिका–६ मा दिनदहाडै स्काभेटर प्रयोग गरी त्रिशूली नदीको बगर, ढुंगा, गिटी र बालुवा उत्खनन भइरहेको छ । यसलाई टिफर र ट्रयाक्टरमा लोड गर्ने दृश्य जो कोहीले सहजै देख्न सक्छ ।

स्थानीयहरूले आरोप लगाएका छन् कि–यस अवैध दोहनमा गाउँपालिकाको प्रत्यक्ष संलग्नता वा कम्तीमा मौन समर्थन रहेको देखिन्छ । प्रहरी र प्रशासनिक कार्यालय नजिक भए पनि यस क्षेत्रमा भइरहेको संगठित उत्खननप्रति उनीहरूको मौनता ‘सेटिङ’ को आशंका बलियो बनाएको छ ।

एक स्थानीयले नाम नखुलाउने शर्तमा भने, ‘गाउँपालिकाले आफैं नियम मिचेर दोहन बढावा दिइरहेको छ, अनि प्रहरी–प्रशासन टुलुटुलु हेरेर बसिरहेका छन् । कानुनको पालना गराउनु पर्ने निकायहरूले नै तस्करहरूसँग मिलेर राज्यको प्राकृतिक स्रोत लुट्न सक्रिय हुनु दुःखद छ । ’