बारामा रास्वपा : प्रत्यक्षमा ‘क्लिन स्वीप’, समानुपातिकमा पहिलो
फागुन २५, २०८२ सोमबार १५:३२:५७
सिमरा : बारामा ‘क्लिन स्वीप’ गरेको राष्ट्रिय स्वतन्त्र पार्टी (रास्वपा) ले समानुपातिकतर्फ पनि बलियो जनमत बटुलेको छ । प्रत्यक्षतर्फ जिल्लाको चार वटै निर्वाचन क्षेत्र बिजय हासिल गरेको रास्वपाले समानुपातिकतर्फ पनि ५५.५ प्रतिशत मत पाएको छ ।
चार वटा निर्वाचन क्षेत्रबाट रास्वपाले एक लाख ७६ हजार ६७ मत पाएको हो । बारामा समानुपातिकतर्फ तीन लाख १७ हजार एक सय ८४ मत खसेको थियो । बारा क्षेत्र नं. १ मा रास्वपाले ४२ हजार एक सय ७१ मत पाएको छ । खसेको ८० हजार ३८ मतमा नेकपा कांग्रेसले १२ हजार दुई सय ४५, नेकपा एमालेले ९ हजार ९ सय ३३, जसपा नेपालले दुई हजार ६ सय २६, नेकपाले दुई हजार चार सय ४३, राप्रपाले एक हजार तीन सय ७८ मत प्राप्त गरेका छन् ।
क्षेत्र नं. २ मा रास्वपाले ३९ हजार ६ सय १९ मत पाँउदा जसपा नेपालले ११ हजार ९ सय ९, कांग्रेसले १० हजार तीन सय ३०, एमालेले ६ हजार तीन सय ५६, राप्रपाले एक हजार ३७, नेकपाले ९ सय ८४ मत प्राप्त गरेको छ । यस क्षेत्रमा ७७ हजार ९ सय १७ मत खसेको थियो ।
बारा क्षेत्र नं. ४ मा रास्वपाले जिल्लाभरीकै सर्वाधिक मत पाएको छ । ८० हजार ९ सय १५ मत खसेको उक्त क्षेत्रमा रास्वपा एक्लैले ५० हजार चार सय २१ मत पाएको छ । उक्त क्षेत्रमा एमालेले आठ हजार ९ सय ८४, कांग्रेसले पाँच हजार १८, जसपा नेपालले चार हजार ४७, नेकपाले एक हजार ९ सय ४८, राप्रपाले एक हजार सात सय ८५ मत प्राप्त गरेको छ ।
प्रत्यक्षतर्फ बारा क्षेत्र नं. १ मा रास्वपाका गणेश धिमाल ३९ हजार ९ सय ९८ मत, बारा क्षेत्र नं. २ मा चन्दनकुमार सिंह ३५ हजार पाँच सय ९० मत, बारा क्षेत्र नं. ३ मा अरविन्द साह ४० हजार ६ सय ९७ मत र बारा क्षेत्र नं. ४ मा रहबर अन्सारी ४१ हजार दुई सय मत प्राप्त गर्दै निर्वाचित भएका थिए । २०७९ सालमा एमालेले जितेको दुई, तत्कालिन नेकपा एकीकृत समाजवादी र जसपा नेपालले जितेको एक–एक गरी चार वटै क्षेत्रमा रास्वपाले जितको झण्डा गाडेको हो ।
प्रतिक्रिया दिनुहोस !
