विराटनगर : प्रहरीले विराटनगर महानगरपालिका–३ बाट गाँजासहित दुई जना भारतीय नागरिकलाई पक्राउ गरेको छ । शुक्रबार दिउँसो करिब १ बजे शंकास्पद रूपमा पैदल हिँडिरहेका उनीहरूलाई प्रहरीले नियन्त्रणमा लिएको हो ।
पक्राउ पर्नेमा भारतको अररिया जिल्ला घर भएका १८ वर्षीय पृथ्वीकुमार सिंह र २२ वर्षीय कृष्णकुमार सिंह रहेका छन् । जिल्ला प्रहरी कार्यालय मोरङबाट सई सुवास अधिकारीको नेतृत्वमा खटिएको टोलीले उनीहरूलाई चेकजाँचका लागि रोकेको थियो ।
उनीहरुको साथमा रहेको निलो झोला खानतलासी गर्दा भित्र लुकाएर राखिएको ११ किलो गाँजा बरामद भएको मोरङ प्रहरीका सूचना अधिकारी डीएसपी लीलाराज लामिछानेले बताए । बरामद गाँजासहित दुवै जना भारतीय युवालाई नियन्त्रणमा लिएर थप अनुसन्धान अघि बढाइएको जानकारी उनले दिए ।
प्रहरीका अनुसार उनीहरूले गाँजा कहाँबाट ल्याएका हुन् र कता लैजान लागेका थिए भन्ने विषयमा यकिन भइसकेको छैन । प्रारम्भिक रूपमा भारततर्फ लैजान खोजिएको हुनसक्ने अनुमान गरिएको छ । उनीहरुविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।
प्रतिक्रिया दिनुहोस !
