धादिङ : जिल्ला निर्वाचन कार्यालय धादिङले सार्वजनिक गरेको तथ्यांकअनुसार प्रतिनिधिसभा सदस्य निर्वाचनअन्तर्गत धादिङ जिल्लामा १२ हजार २ सय मत बदर भएका छन् । प्रत्यक्ष र समानुपातिक दुवै प्रणालीतर्फ उल्लेख्य संख्यामा मत बदर भएको देखिएको छ ।
कार्यालयका अनुसार प्रत्यक्षतर्फ धादिङ क्षेत्र नम्बर–१ मा ३ हजार १ सय ५२ मत बदर भएका छन् भने धादिङ क्षेत्र नम्बर–२ मा ३ हजार ८ सय ५० मत बदर भएको छ । त्यसैगरी समानुपातिकतर्फ क्षेत्र नम्बर–१ मा २ हजार ३ सय ५५ र क्षेत्र नम्बर–२ मा २ हजार ८ सय २० मत बदर भएका छन् । यी सबै जोड्दा जिल्लाभर १२ हजार २ सय मत बदर भएको तथ्यांकले देखाएको छ ।
यस निर्वाचनमा धादिङ जिल्लामा कुल ५७ दशमलव २६ प्रतिशत मत खसेको थियो । मतपत्रमा एकभन्दा बढी चिन्ह लगाउने, गलत स्थानमा छाप लगाउने तथा मत हाल्ने तरिका नबुझ्ने जस्ता कारणले धेरै मत बदर भएको निर्वाचन कार्यालयले जनाएको छ । तथ्यांकअनुसार क्षेत्र नम्बर १ मा १ लाख ४६ हजार २ सय ४८ मतदाता रहेकामा ५४ हजार २ सय ७३ मत खसेको थियो।
तीमध्ये ५ हजार ३ सय ५७ मत बदर भएका छन् । त्यस्तै क्षेत्र नम्बर २ मा १ लाख ४५ हजार २ सय ५७ मतदाता रहेकामा ६३ हजार ८ सय ७० मत खसेको थियो । तीमध्ये ६ हजार ८ सय ५० मत बदर भएको तथ्यांकले देखाएको छ । क्षेत्र नम्बर १ अन्तर्गत प्रत्यक्षतर्फ १ लाख ३४ हजार ६६८ मतदाता रहेकामा ५४ हजार १६ मत खसेको थियो। तीमध्ये ५० हजार ५४९ मत सदर भएका छन् । त्यस्तै समानुपातिकतर्फ ५४ हजार २ सय ७ मत खसेकामा ५२ हजार ४८७ मत सदर भएको निर्वाचन कार्यालयले जनाएको छ ।
त्यसैगरी क्षेत्र नम्बर २ अन्तर्गत प्रत्यक्षतर्फ १ लाख २८ हजार ४४४ मतदाता रहेकामा ७३ हजार ६ सय ९१ मत खसेको थियो । तीमध्ये ६६ हजार ५४१ मत सदर भएको छ । समानुपातिकतर्फ १ लाख ४१ हजार ४२२ मतदाता रहेकामा ७४ हजार २ सय ४७ मत खसेको र त्यसमध्ये ७१ हजार ७६७ मत सदर भएको तथ्यांकमा उल्लेख छ । निर्वाचनलाई व्यवस्थित बनाउन जिल्ला निर्वाचन कार्यालयले स्वयंसेवक परिचालन गर्दै मतदाता शिक्षा कार्यक्रम सञ्चालन गरेको भए पनि अपेक्षा गरेअनुसार मत बदरको संख्या घट्न नसकेको जनाएको छ ।
प्रतिक्रिया दिनुहोस !
