वीरगन्ज : प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत पहिलो दिनको दुबै खेल वर्षाले प्रभावित बनेको छ । वर्षा नरोकिएपछी वीरगन्ज र जनकपुरधामस्थित रंगशालामा हुन लागेको दुबै खेल रद्द गरिएको हो ।
वीरगन्जस्थित नारायणी रंगशालामा कर्णाली र लुम्बिनी तथा जनकपुरधामस्थित रामजानकी रंगशालामा मधेस र कोशीबीचको खेल रद्द भएको हो । खेल रद्द भएपछी चार वटै टिमले १–१ अंक बाडेका छन् ।
कर्णाली र लुम्बिनीको खेल सुरु भएर रोकिएको थियो भने मधेस र कोशीको खेल टस नहुँदै रद्द भएको हो । यसअघि जनकपुरमा मधेस प्रदेशका खेलकुद तथा समाज कल्याण मन्त्री बसन्तकुमार कुशवाहा र वीरगन्जमा महानगरपालिकाका प्रमुख राजेशमान सिंहले प्रतियोगिताको शुभारम्भ गरेका थिए ।
वर्षा सुरु हुनुअघि वीरगन्जमा कर्णालीले ब्याटिङ गर्दै सात ओभरमा २० रन जोडेको थियो । कर्णालीका ओपनर रवीन्द्र शाहीले ९ र सुनिल धमलाले ७ रन बनाएका थिए भने लुम्बिनीका बलर सन्देश थापाले चार ओभर बलिङ गर्दै १२ रन र राजेन्द्र बमले तीन ओभर बलिङ गर्दै एक मेडनसहित आठ रन खर्चिएका थिए ।
यसअघि लुम्बिनीले टस जितेर कर्णालीलाई ब्याटिङको निम्तो दिएको थियो । वर्षा नरोकिएपछी दुबै खेल रद्द भएको नेपाल क्रिकेट संघ (क्यान) मधेश प्रदेशका कोषाध्यक्ष सुवास जयसवालले जानकारी दिए । प्रधानमन्त्री कपको यस संस्करण मधेस प्रदेशका दुई र काठमाडौंको तल्लो र माथिल्लो मुलपानी गरी चार रंगशालामा हुँदैछ ।
प्रतियोगिताको फाइनलसहित १९ वटा खेल वीरगन्जमा र उद्घाटनसहित १७ वटा खेल जनकपुरमा हुनेछन् भने बाँकी १० वटा खेल तल्लो र माथिल्लो मुलपानी क्रिकेट मैदानमा हुनेछ । आईसीसी विश्वकप लिग २ को तयारीका लागि कीर्तिपुरस्थित त्रिवि अन्तर्राष्ट्रिय रंगशालामा प्रधानमन्त्री कपको कुनै पनि खेल हुने छैन । नेपाल क्रिकेट संघ (क्यान) ले त्रिवि रंगशालामा तय भएका सबै खेल तल्लो मुलपानी रंगशालामा सारेको छ ।
झण्डै एक महिनासम्म आयोजना हुने प्रतियोगितामा तीन विभागीय र सात वटा प्रदेश गरी १० टोलीको सहभागिता रहेको छ। प्रतियोगिताको विजेताले १० लाख र उपविजेताले पाँच लाख नगद पुरस्कार प्राप्त गर्नेछन् । नेपाल पुलिस क्लब प्रतियोगिताको साविक विजेता टोली हो ।
प्रतिक्रिया दिनुहोस !
