काठमाडौं : प्रधानमन्त्री कप एक दिवसीय राष्ट्रिय क्रिकेट प्रतियोगिता २०२६ मा वसिर अहमदको शतकीय पारीमा आर्मीले पुलिसलाई २४४ रनको विजयी लक्ष्य प्रस्तुत गरेको छ ।
तल्लो मूलपानी मैदानमा टस जितेर पहिले ब्याटिङ गरेको आर्मीले निर्धारित ४७ ओभरमा ८ विकेट गुमाउँदै २४३ रन बनाएको हो । तल्लो मूलपानीमा मैदान भिजेको हुँदा ओभर घटाएर ४७ ओभरको खेल सञ्चालन गरिएको हो ।
आर्मीको लागि मध्यक्रमका ब्याटर वसिर अहमदले शतकीय पारी खेले । उनले ८६ बलमा ८ चौका र २ छक्का प्रहार गरे । जारी प्रधानमन्त्री कपमा शतक बनाउने उनी दोस्रो खेलाडी हुन् । पहिलो आज नै माथिल्लो मूलपानी मैदानमा जारी खेलमा एपीएफका आसिफ शेखले शतकीय पारी खेलेका थिए ।
भिम सार्कीले ६२ रनको अर्धशतकीय पारी खेले । ओपनरद्वय तृतराज दास र इम्रान शेखले क्रमशः १३ र १० रन बनाउँदै पेभेलियन फर्किए । अर्जुन साउदले १० रन बनाए । नरेन साउद २१ रनमा अविजित रहे । नेपाल पुलिसका लागि श्रवण यादवले ३ विकेट लिए । सागर ढकाल र रसिद खानले २–२ विकेट लिए। ललित राजवंशीले १ विकेट लिए ।
प्रतिक्रिया दिनुहोस !
