भक्तपुर : सात वर्षअघि अंग प्रत्यारोपण गरेका कपिलवस्तुका ६२ वर्षीय खिमबहादुर बस्नेत दूधपाटीस्थित सहिद धर्मभक्त राष्ट्रिय प्रत्यारोपण केन्द्रको नियमित फलोअपमा छन् । तर, हरेकपटक चिकित्सक भेट्न ओपीडी टिकटकै लागि उनको थलिएको शरीरले संघर्ष गरिरहनु परेको छ ।
मंगलबार बिहान ५ बजे नै अस्पताल पुगेर लाइन बसेका उनले यसपटक पनि टिकट पाएनन् । त्यतिमात्र होइन, दैनिक १ सय २० बिरामीलाई मात्र ओपीडी टिकट बाँड्दै आएको अस्पतालले ६९ नम्बरमा पालो बसेका बस्नेतलाई टिकट नदिएपछि उनी दुःखी देखिए ।
आफूपछि लाइन बसेकालाई टिकट दिइएको गुनासो गर्दै उनले अस्पतालका कर्मचारीले मिलेमतोमा आफ्ना मान्छेलाई टिकट सुरक्षित गरिदिने र लाइनमा बसेकाले नपाउने गरेका आरोप लगाए । ‘अघिल्लोपटक पनि म ६ नम्बरमा लाइन बसेको थिए, ९ नम्बरको टोकन पाएँ,’ अन्नपूर्ण पोस्ट्सँग बस्नेतले भने, ‘यहाँ ओपीडी टिकटमै गोलमाल गरिन्छ ।’
सतुंगलका कृष्ण रसाइली आफ्नो आमाको उपचारका लागि आइतबारदेखि केन्द्रमा धाइरहेका छन् । मंगलबार बिहान ४ बजेदेखि लाइन लागेका उनको पनि टिकटको पालो आएन ।
बिमामार्फत उपचार गराउनुपर्ने र मुख्य अस्पतालले आमालाई यहाँ रिफर गरिदिएपछि उनीसँग धाउनुको विकल्प पनि देखिएको छैन । बाराबाट बिरामी लिएर आएका केबी थिङले १० हजार खर्च गरेर बिरामी ल्याइपुर्याउनुपर्ने तर, टिकट नपाइने बाध्यता बताए । रौतहटबाट श्रीमतीको उपचारमा आएका ५५ वर्षीय लालबाबु साह पनि टिकटकै लागि तनाब लिनुपर्दा हतोत्साही बनेको बताउँछन् ।
छोराको उपचारका लागि आएका बुटबलका सागर पाण्डेले बिरामीको समस्या नजरअन्दाज गर्न नहुने बताएका छन् । राष्ट्रिय प्रत्यारोपण केन्द्रले जनशक्ति बढाउनुपर्नेमा जोड दिँदै उनले टाढाबाट आउने बिरामीको समस्या बुझ्नुपर्ने बताए ।
रामेछापका पवित्र तामाङले बिहानै लाइन लाग्नुपर्दा नजिकका बिरामीलाई सहज भए पनि टाढाबाट आउने बिरामी मारमा पर्ने र उपचारै नपाउने अनुभव सुनाए । कुरा टाढाको मात्र होइन भक्तपुरकै बिरामीले पनि यहाँ सजिलै टिकट पाउँदैनन् ।
बिहान ४ बजेदेखि नै लाग्ने टिकटको लाइन टिठलाग्दो भएको स्थानीय सामाजिक अभियन्ता सूर्य श्रेष्ठ बताउँछन् । अस्पतालले अनलाइनबाटै टिकट दिनुपर्ने र एकाबिहानैदेखि लाइन बस्नुपर्ने बाध्यता हटाउनुपर्ने उनको भनाइ छ । सहिद धर्मभक्त राष्ट्रिय प्रत्यारोपण केन्द्रकी कार्यकारी निर्देशक डा. कल्पनाकुमारी श्रेष्ठले पर्याप्त टिकट वितरण गर्न नसकिएको र प्रत्येक दिन बिरामी फर्काउनुपरेको स्वीकार गरेकी छन् ।
टिकटमा गोलमाल गरिएको विषयबारे आफूलाई गुनासो आएको र त्यसको अनुगमन गरिने उनले जानकारी गराइन् । टिकटमा कर्मचारीको मिलेमतो भएको आरोप भने अस्पताल प्रशासनले अस्वीकार गरेको छ ।
अस्पतालमा लामो समयदेखि उपचाररत बिरामीहरूका आफन्तले तल्लो तहको कर्मचारीलाई प्रभावित गरी गडबडी गरेको हुन सक्ने प्रशासनको प्रतिक्रिया छ ।
सहिद धर्मभक्त राष्ट्रिय प्रत्यारोपण केन्द्र स्रोतले दिएको जानकारीअनुसार अस्पतालमा ६ जना चिकित्सक रहेकामा अहिले दुई जना मात्र कार्यरत रहेकाले पनि सेवा प्रभावित भएको छ । व्यक्तिगत कारण देखाउँदै चिकित्सकहरू लामो समयदेखि बिदामा बसेका कारण ओपीडी सेवा मात्र प्रभावित भएको छैन, सातामा चारवटाभन्दा बढी अंग प्रत्यारोपणसमेत हुन् सकेको छैन ।
१३ वर्षअघि भक्तपुर अस्पताल परिसरमा स्थापित अंग प्रत्यारोपण केन्द्रले १ हजार ५ सयभन्दा बढी मिर्गौला प्रत्यारोपण र ३ दर्जन बढी कलेजो प्रत्यारोपण गरेको छ । त्यसका लागि त्यतिकै संख्यामा अंग दाताहरू पनि रहेका छन् । उनीहरू नियमित फलोअपका लागि केन्द्रमा आउने गरेका छन् भने नयाँ बिरामीको चाप पनि उत्तिकै छ ।
सहिद धर्मभक्त राष्ट्रिय प्रत्यारोपण केन्द्रमा १२ वर्ष नेतृत्व गरेका डा पुकारचन्द्र श्रेष्ठको अवकाश सँगै गत मंसिरबाट कार्यकारी निर्देशक पदमा डा कल्पनाकुमारी श्रेष्ठ कार्यरत छिन् । केन्द्रलाई नमुनाको रूपमा प्रस्तुत गर्नुपर्नेमा बिरामीले चिकित्सक भेट्नसमेत संघर्ष गर्नुपर्ने अवस्थाको अन्त्य गर्नुपर्ने चुनौती उनीसँग रहेको छ ।
प्रतिक्रिया दिनुहोस !
