राखेपको प्रश्नमा एन्फाको जवाफ : चुनाव नगरे फिफा र एएफसीको प्रतिबन्ध !

काठमाडौं : अखिल नेपाल फुटबल संघ (एन्फा) ‘चैते रमाउने’ भन्दै चुनावी प्रक्रियामा हस्तक्षेप नगर्न राखेपलाई पत्राचार गरेको छ । 
राष्ट्रिय खेलकुद परिषद् राखेपले मंगलबार एक पत्राचार गर्दै एन्फालाई खेलकुद ऐन–२०७७ अन्तर्गतको धारा २८ को (ड)  बमोजिम कारबाही नगर्नु पर्नाको स्पष्ट कारण खुलाउन २४ घण्टे अल्टिमेटम दिएको थियो ।

सोही पत्रको उत्तरस्वरूप एन्फाले फिफा र एएफसीले तेस्रो पक्षको हस्तक्षेप भएको खण्डमा एन्फालाई प्रतिबन्ध लगाउने चेतावनी पाएको हुँदा राखेपलाई हस्तक्षेप नगर्न अनुरोध गरेको छ । 

राखेपको उत्तर दिँदै एन्फाले निर्वाचन स्थगन भएको खण्डमा नेपाली फुटबल अन्तर्राष्ट्रिय गतिविधिलगायत फिफा र एएफसीबाट नेपाली फुटबलले प्राप्त गर्ने आर्थिक प्राविधिकलगायत सम्पूर्ण सहयोग स्थगन हुने भएकाले संघको घोषित मितिमा हुने निर्वाचन सम्पन्न गर्न बाध्यात्मक अवस्था सिर्जना भएको भन्दै उत्तर पठाएको हो । एन्फाले राखेपको प्रश्नको उत्तर स्वरूप दुई पृष्ठको सफाई पेश गरेको छ ।

पछिल्लो समय राखेप र एन्फाबीच चुनावी प्रकरण, राष्ट्रिय लिग २०८२ तथा एन्फा महिला लिगलाई लिएर विवाद चुलिएको थियो । एन्फाले तहगत चुनाव नगराई संघीय चुनाव गराउन लागेको भन्दै चुनाव एन्फाको विधान विपरीत भएको राखेपमा उजुरी परेको थियो ।

सोही उजुरीलाई सुनुवाई गर्दै राखेपले एन्फासँग बारम्बार छलफल र पत्राचारको दोहोरी खेलिरहेको छ । एन्फाले भने चैत १३ गतेको चुनावका लागि चैत्र १० गतेदेखि नै सातदोबाटोस्थित केन्द्रीय कार्यालय बन्द हुने सूचना जारी गरिसकेको छ ।