काठमाडौं : विकसित देशहरुमा मात्र होइन अहिले विकासशिल देशका नागरिकहरुमा पनि घुमफिर सौखको विषय बन्न थालेको छ । पुरुष मात्र नभई महिलाहरु समेत अहिले एक देशबाट अर्को देश घुमफिरका लागि पुग्ने प्रचलन बढ्दै गएको छ । विशेषतः घुमफिरका लागि सुरक्षा पहिलो शर्तमा रुपमा आउने गरेको छ ।
यसमा पनि महिलाका लागि सुरक्षा महत्वपूर्ण मानिन्छ । आर्थिक रुपमा सबल महिलाहरु घुमफिरका लागि विभिन्न देश पुग्ने गरेका छन् । यसका लागि उनीहरुले सबै भन्दा सुरक्षित देशलाई छान्ने गरेका छन् । कोस्टारिकाका सामाजिक सर्फ टाउनदेखि नर्वेका टाढाका आर्कटिक भू–दृश्यसम्म, नयाँ तथ्यांक र यात्रुहरूको अनुभवले देखाउँछ कि एक्लै यात्रा गर्ने महिलाहरू कहाँ सबैभन्दा सुरक्षित महसुस गर्छन् ।
सबै संकेतहरूले देखाउँछन् कि एक्लै यात्रा गर्ने महिलाहरू आजको यात्रा ट्रेन्डलाई अगाडि बढाइरहेका छन् । धेरै टुर अपरेटरहरूका अनुसार, यो समूह विशेष गरी ५० वर्षभन्दा माथिका महिलाहरूमा सबैभन्दा तीव्र रूपमा बढिरहेको छ, जो साथीको प्रतीक्षा नगरी यात्रा गर्न निस्किरहेका छन् । पछिल्ला पाँच वर्षमा ‘सोलो ट्राभल फर ओमन’ को खोज विश्वभर ३० प्रतिशतले बढेको छ ।
रुचि बढ्दै गएको भए पनि धेरै महिलाहरूलाई अझै पनि सुरक्षासम्बन्धी चिन्ता छ । फेब्रुअरी २०२६ मा गरिएको एक सर्वेक्षण अनुसार, ५९ प्रतिशत महिलाले राति एक्लै हिंड्नु सबैभन्दा चिन्ताजनक पक्ष भएको बताएका छन् । महिलाहरूले पुरुषहरूभन्दा बढी ‘सुरक्षा’ लाई एक्लै यात्रा नगर्ने कारणका रूपमा बताएका छन् ।
एक्लै यात्रा गर्ने महिलाहरूका लागि कुन देश सुरक्षित छन् भन्ने एक मात्र विश्वव्यापी सूचक छैन । त्यसैले जर्जटाउन विश्वविद्यालयको महिला, शान्ति र सुरक्षा सूचकाङ्क र वैश्विक शान्ति सूचकाङ्कको आधारमा, साथै एक्लै यात्रा गरेका महिलाहरूको अनुभवलाई समेटेर, २०२६ का लागि उत्कृष्ट देशहरू यस प्रकार छन् :
कोस्टारिका : यो मध्य अमेरिकी देश संसारकै सबैभन्दा खुशी देशहरूमध्ये एक मानिन्छ । महिला, शान्ति र सुरक्षा सूचकाङ्कमा यो ६० औं स्थानबाट ३४ औं स्थानमा उक्लिएको छ । यहाँ एक्लै यात्रा गर्ने महिलाहरूका लागि मानिसहरू भेट्न सजिलो हुन्छ । निकाया प्रायदीपको सान्ता तेरेसा र नोसारा जस्ता स्थानहरूमा सर्फिङ, योग र क्याफे संस्कृतिले सामाजिक वातावरण बनाउँछ । पहिलो पटक जानेहरूलाई सर्फ लेसन वा गाइडेड हाइक जस्ता गतिविधि बुक गर्न सल्लाह दिइन्छ । साथै, सामाजिक गेस्टहाउस वा बुटिक होटल रोज्नु राम्रो हुन्छ ।
एस्टोनिया : एस्टोनिया महिला, शान्ति र सुरक्षा सूचकाङ्कमा ११ औं स्थानमा पुगेको छ । यहाँ अपराध दर कम र सामाजिक स्थिरता उच्च छ । राजधानी टालिनको युनेस्को सूचीमा परेको पुरानो सहर एक्लै घुम्न सजिलो छ । ‘किक इन डे कुक’ संग्राहलय र बास्टियन सुरुङहरु ऐतिहासिक रूपमा निकै रोचक छन् । ‘टाबासालु प्रकृति पार्क’ जस्ता प्राकृतिक क्षेत्रहरू शान्त र सुरक्षित अनुभवका लागि उपयुक्त छन् ।
भियतनाम : वैश्विक शान्ति सूचकाङ्कमा ३८ औं स्थानमा रहेको भियतनाम दक्षिण–पूर्व एशियाका सुरक्षित देशहरूमध्ये एक हो । यहाँका स्थानीय मानिसहरू मैत्रीपूर्ण र सहयोगी हुन्छन् । साना समूहका टुर, स्ट्रिट फूड अनुभव र होमस्टेहरूले सामाजिक सम्बन्ध बनाउन मद्दत गर्छन् । सा पामा ट्रेकिङ र ‘मेकोङ डेल्टा’ मा होमस्टे विशेष अनुभवहरू हुन सक्छन् ।
उरुग्वे : उरुग्वे महिला, शान्ति र सुरक्षा सूचकाङ्कमा ३५ औं स्थानमा पुगेको छ र दक्षिण अमेरिकाको दोस्रो सबैभन्दा शान्त देश हो । ‘कोलोनीय डेल साक्रामेटो’ को ऐतिहासिक क्षेत्र विशेष आकर्षण हो । ‘पुन्टा डेल डियाब्लो’ जस्तो शान्त समुद्री गाउँ एक्लै घुम्न उपयुक्त छ । राजधानी ‘मोन्टेभिडियो’ मा समुद्र किनारको ‘रम्ब्ला’ बाट साइकल चलाएर शहर घुम्न सकिन्छ ।
नर्वे : नर्वे महिला, शान्ति र सुरक्षा सूचकाङ्कमा तेस्रो स्थानमा छ र महिला सुरक्षाका लागि विश्वकै उत्कृष्ट देशहरूमध्ये एक हो । स्वालबार्डमा आर्कटिक वन्यजन्तुहरू देख्न सकिन्छ, भने लोफोटेन टापुका सुन्दर दृश्यहरू हेर्दै एक्लै यात्रा गर्न सकिन्छ । यहाँको प्रकृति, शान्त वातावरण र सुरक्षित समाजले एक्लै यात्रा गर्ने महिलाहरूलाई आत्मविश्वास दिन्छ ।
प्रतिक्रिया दिनुहोस !
