प्रधानमन्त्री कप क्रिकेटमा मधेसको अपराजित यात्रा कायमै, लुम्बिनी २५ रनले पराजित

सिमरा : प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत शुक्रबार भएको खेलमा मधेस प्रदेश २५ रनले बिजयी भएको छ । प्रतियोगितामा अपराजित रहने क्रममा मधेसले लुम्बिनी प्रदेशमाथि जित हात पारेको हो । जनकपुरस्थित रामजानकी रंगशालामा टस जितेर पहिले ब्याटिङ रोजेको मधेसले ३८.१ ओभरमा सबै विकेट गुमाएर १३८ रन जोडेको थियो ।

मधेसका लागि ओपनर मयन यादवले ३१, आदिल आलमले २३ र पवन सर्राफले १९ रन बनाए । कप्तान अनिल साह एक बनाएर पेभेलियन फर्किए । १० रनको स्थितिमा कप्तान साहलाई गुमाएको मधेसको ब्याटिङ लाइनअप लरखराएको थियो । मधेशले अन्तिम तीन विकेट १२४ रनको स्थितिमा गुमाउन पुगेको थियो । मधेसलाई सामान्य रनमै रोक्ने क्रममा लुम्बिनीका तीव्र गतिका बलर सन्देश थापा र सन्तोष थापाले समान तीन–तीन, अजय चौहानले दुई र निर्मल गुरुङले एक विकेट लिए । 

मधेसले दिएको १२५ रनको सामान्य लक्ष्य पछ्याउन मैदानमा उत्रिएको लुम्बिनी झनै कमजोर देखियो । लुम्बिनीले २६ ओभरमै आफ्नो सबै विकेट गुमाएर ९९ रन मात्रै जोड्न सफल भयो । लुम्बिनीका सुमित श्रेष्ठले ३०, सन्देश थापाले १६ र कप्तान देव खनालले १२ रन बनाउँदा अन्य ब्याटरले दोहोरो अंकमा रन जोड्न सकेनन् । लुम्बिनीका चार ब्याटर शून्यको स्थितिमा आउट भएका थिए । 

लुम्बिनीको ब्याटिङ लाइनअप ध्वस्त पार्ने क्रममा मधेसका विशाल पटेल एक्लैले पाँच विकेट लिए । पहिलो ओभरमै लुम्बिनीका ओपनर रञ्जित खड्कालाई शिकार बनाएका विशालले आकाश त्रिपाठी, प्रज्ववल थापा, ध्रुव सुनार र निर्मल गुरुङलाई मैदान बाहिर पठाएका थिए । प्लेयर अफ दि म्याच विशालले ९ ओभर बलिङ गर्दै २४ रन खर्चिए । यसैगरी मधेसका प्रदीप पासवानले दुई विकेट लिँदा रुपेश सिंह, आदिल आलम र आशिक बैठाले समान एक–एक विकेट लिए । 

जितसँगै मधेस अंकतालिकाको शीर्ष स्थानमा उक्लिएको छ । तीन खेलमा दुई जित र एक बराबरीका साथ मधेसले पाँच अंक बटुलेको छ । वर्षाका कारण पहिलो खेलमा कोशीसँग १–१ अंक बाँडेको मधेसले दोस्रो खेलमा सुदूरपश्चिलाई पाँच विकेटले पराजित गरेको थियो । प्रतियोगितामा पहिलो हार व्यहोरेको लुम्बिनी भने तीन अंकका साथ तालिकाको पाँचौं स्थानमा छ । वर्षाका कारण पहिलो खेल रद्द भएपछि कर्णालीसँग १–१ अंक बाँडेको लुम्बिनीले दोस्रो खेलमा कोशीलाई १४८ रनले पराजित गर्दै दुई अंक बटुलेको थियो ।