इरान समर्थित मिलिसियालाई कमजोर पार्न अमेरिकी रणनीति : रोकिदियो डलर

अमेरिका : संयुक्त राज्य अमेरिकाले इराकतर्फ पठाइने अमेरिकी डलरको ढुवानी रोकिदिएको छ । यस कदमले बग्दादमाथि इरान समर्थित शक्तिशाली समूहहरूलाई नियन्त्रण गर्न थप दबाब सिर्जना गरेको अमेरिकी अधिकारीहरुले दावी गरेका छन् ।

करिब ५० करोड डलर बराबरको अमेरिकी नोट बोकेको कार्गो विमानलाई युनाइटेड स्टेट डिपार्टमेन्टले रोकेको बताइएको छ । उक्त रकम इराकको तेल आम्दानीबाट आएको हो ।  जुन ‘फेडरल रिजर्भ बैंक’ र न्यूयोर्कमा राखिएको खातामा थियो । यो रोकावट, अमेरिका–इजरायल र इरानबीच फेब्रुअरी अन्त्यतिर सुरु भएको युद्धपछि वासिङ्टनले इराकको केन्द्रीय बैंकका लागि तय गरिएको दोस्रो डलर ढुवानीपछि ढिलाइ गरेको घटना हो ।

लगभग आठ हप्तासम्म चलेको युद्धबीच अमेरिकाले इराकलाई आफू नजिक ल्याउन र इरानसँगको दीर्घकालीन सम्बन्ध कमजोर बनाउन दबाब दिइरहेको छ । इरान समर्थित समूहहरूले इराकभित्रै अमेरिकी सैन्य आधारहरू र छिमेकी देशहरूलाई लक्षित गर्दै आक्रमण गरेका छन् । जसलाई उनीहरूले तेहरानको समर्थनमा गरिएको बताएका छन् ।

यसका साथै, अमेरिकाले इरानसँग सम्बन्धित इराकका सशस्त्र समूहहरू-जसमध्ये ‘जनमोबिलाइजेसन फोर्स’ सँग जोडिएका समूहहरूमाथि हवाई आक्रमण समेत गरेको छ । यी समूहहरू औपचारिक रूपमा इराकको सुरक्षा संरचनाभित्र समावेश छन् ।

इराकको केन्द्रीय बैंकले जारी गरेको वक्तव्यमा रोकिएको ढुवानीबारे सिधै उल्लेख गरिएको छैन, तर देशसँग पर्याप्त अमेरिकी डलर सञ्चिति रहेको बताइएको छ । सन् २००३ मा अमेरिकाको नेतृत्वमा भएको इराक युद्धपछि, अमेरिकाले इराकको तेल आम्दानी व्यवस्थापन आफ्नो नियन्त्रणमा लिएको थियो । यसका लागि अर्बौं डलर रकम न्यूयोर्कस्थित फेडरल रिजर्भ बैंकमा राखिएको थियो ।