अफगानिस्तान : अफगानिस्तानमा एक ट्रक पल्टिँदा त्यसमा सवार १० बालबालिकासहित १८ जनाको मृत्यु भएको छ । यसबारे प्रान्तीय अधिकारीले एएफपी समाचार संस्थालाई जानकारी दिएका छन् ।
दशकौँ लामो द्वन्द्वका कारण सडकको खराब अवस्था, लापरवाह सवारी सञ्चालन तथा पर्याप्त नियम–कानुनको अभावका कारण अफगानिस्तानमा घातक सडक दुर्घटनाहरू सामान्य जस्तै भएका छन् । लघमान प्रान्तका गभर्नरका प्रवक्ता अब्दुल मलिक नियाजायका अनुसार उक्त ट्रकमा पाकिस्तानबाट फर्किरहेका अफगान परिवारहरू सवार थिए, जहाँ उनीहरू बसोबास गर्दै आएका थिए ।
उनले भने, ‘१८ जनाको मृत्यु भएको छ, जसमा १० बालबालिका, पाँच महिला र तीन पुरुष छन् । साथै २९ जना घाइते भएका छन् ।’ दुर्घटना पूर्वी अफगानिस्तानको जलालाबाद र राजधानी काबुल जोड्ने सडक खण्डमा भएको हो ।
हालका महिनाहरूमा पाकिस्तानले आफ्नो देशमा रहेका अफगान आप्रवासी र शरणार्थीप्रति कडा नीति अपनाएपछि ठूलो संख्यामा अफगानहरू स्वदेश फर्किरहेका छन् । धेरै परिवारहरू आफ्ना सामानसहित ट्रकमार्फत यात्रा गरिरहेका छन् ।
संयुक्त राष्ट्रसंघीय शरणार्थी उच्चायुक्त र अन्तर्राष्ट्रिय आप्रवासन संगठनका अनुसार सन् २०२६ को सुरुदेखि हालसम्म ४ लाख ४७ हजार ४ सय अफगान नागरिक पाकिस्तानबाट अफगानिस्तान फर्किएका छन् । गत वर्ष अगस्टमा पनि पश्चिमी अफगानिस्तानमा इरानबाट फर्किरहेका अफगान आप्रवासी बोकेको बस दुई अन्य सवारीसँग ठोक्किँदा १९ बालबालिकासहित ७८ जनाको मृत्यु भएको थियो ।
प्रतिक्रिया दिनुहोस !
