कंगोमा विद्रोहीको आक्रमणमा ३० बढीको मृत्यु, इबोला नियन्त्रण अभियान प्रभावित

कंगो : पूर्वी डेमोक्रेटिक रिपब्लिक अफ कंगोको एक सहर वरिपरि भएका विद्रोही आक्रमणमा पछिल्ला केही दिनमा ३० बढी मानिस मारिएका छन् । जसले इबोला नियन्त्रण अभियानमा कठिन भएको छ । 

उत्तरी किभुको बेनी सहर वरिपरिका तीन गाउँमा बुधबार बिहानै गरिएको आक्रमणमा कम्तीमा १० जनाको हत्या गरिएको बताइएको छ । इस्लामिक स्टेटसँग सम्बन्धित मिलिसिया ‘अलाइड डेमोक्रेटिक फोर्सेस’ लाई यी आक्रमणका लागि दोषी ठहर गरिएको छ । उनीहरूले पूर्वी कंगोका मातेते, ममुली र किटोहो गाउँहरूमा आक्रमण गरेका थिए ।

क्षेत्रीय समुदाय नेता इसाक काभालामीले भने, ‘हामीले प्रारम्भिक रूपमा करिब १० जनाको मृत्यु दर्ता गरेका छौं । विद्रोहीहरूले मोटरसाइकल र घरहरू जलाइदिए । उनीहरूले नागरिकहरूलाई अपहरण पनि गरे, जसको संख्या अझै थाहा छैन ।’ बुधबारसम्म उत्तर किभु, दक्षिण किभु र इतुरी प्रान्तहरूमा फैलिएको इबोला प्रकोपमा ३४४ संक्रमित र ६० जनाको मृत्यु दर्ता गरिएको छ ।

शनिबार मध्यरातअघि मिलिसिया बेनी सहरभित्र प्रवेश गरेको थियो, जुन २०२१ देखि कंगो सेनाको प्रशासनिक नियन्त्रणमा रहेको क्षेत्र हो । आक्रमणमा मानिसहरूको टाउको काटिएको र गोली हानिएको बताइएको छ । सयौं मानिस भागेर जङ्गलतर्फ गएका थिए । प्रत्यक्षदर्शीका अनुसार २० भन्दा बढी महिला, पुरुष र बालबालिका मारिएका थिए र दर्जनौँ बेपत्ता छन् ।

स्थानीय बासिन्दा मुम्बेरे सिभ्याले भने, ‘हामी सुत्न तयारी गर्दै थियौँ, अचानक मद्दतको चिच्याहट सुनियो । विद्रोहीले आक्रमण गरेको थियो । हामी ज्यान बचाउन भाग्यौं । बिहान थाहा भयो कि हाम्रा छिमेकीहरूलाई टाउको काटेर मारिएको रहेछ ।’ विद्रोहीले बेनी क्षेत्रमा सर्वसाधारण र सरकारी सेनामाथि आक्रमण बढाएको छ । नागरिक समाजका अनुसार २०१४ यता करिब १०,००० नागरिक मारिएका छन् ।

यो समूह छिमेकी युगान्डामा पनि अत्याचारमा संलग्न भएको आरोप छ । उत्तर किभुका सैन्य गभर्नरले मंगलबार भने अनुसार शनिबारको आक्रमणपछि तीन जना इबोला बिरामी उपचार केन्द्रबाट भागेका छन् । हिंसा र त्रासका कारण इबोला नियन्त्रणका प्रयासहरू गम्भीर रूपमा प्रभावित भएका छन् । यो कंगोमा १९७६ मा पहिलो पटक पहिचान भएयता १७ औं इबोला महामारी हो ।