धादिङ : जेनजी आन्दोलनका क्रममा मकवानपुरको भिमफेदी कारागारबाट फरार भएका डाँका चोरी आरोपमा पक्राउ परेका व्यक्ति रुद्र मोक्तान पुनः चोरी प्रकरणमा पक्राउ परेका छन् । उनीसँगै अन्य दुई जनालाई पनि प्रहरीले नियन्त्रणमा लिएको छ ।
जिल्ला प्रहरी कार्यालय धादिङका अनुसार असार ४ गते मकवानपुरको कैलाश गाउँपालिका–२ बैकुण्ठस्थित बुद्धराम मोक्तानको घरबाट ६ लाख रुपैयाँ नगद चोरी भएको घटनाको अनुसन्धानका क्रममा तीन जनालाई पक्राउ गरिएको हो । इलाका प्रहरी कार्यालय गजुरीबाट खटिएको प्रहरी टोलीले गजुरी गाउँपालिका–६ आदमघाट बजार क्षेत्रमा मोटरसाइकलमा सवार अवस्थामा उनीहरूलाई पक्राउ गरेको प्रहरीले जनाएको छ । पक्राउ परेका रुद्र मोक्तानको साथबाट चोरी भएको रकममध्ये ५ लाख ८० हजार ५ सय ४० रुपैयाँ बरामद गरिएको छ ।
पक्राउ पर्नेमा मकवानपुरको कैलाश गाउँपालिका–२ बैकुण्ठका ३३ वर्षीय रुद्र मोक्तान, धादिङको बेनिघाट रोराङ गाउँपालिका–१ जरुङका २१ वर्षीय अशोक तामाङ र १९ वर्षीय उमेश तामाङ रहेका छन् । प्रहरीले उनीहरूको साथबाट ५ लाख ८० हजार ५ सय ४० रुपैयाँ नगद, ग ८ प ९३२१ नम्बर र न १७ प ४१७५ नम्बरका दुई मोटरसाइकल तथा तीन थान मोबाइल फोन बरामद गरेको छ । प्रहरीका अनुसार रुद्र मोक्तान डाँका चोरी मुद्दामा कैद भुक्तान गरिरहेका बेला जेनजी आन्दोलनका क्रममा भिमफेदी कारागारबाट फरार भएका थिए ।
प्रहरी अभिलेखअनुसार मोक्तानविरुद्ध यसअघि ज्यान मार्ने उद्योग, हातहतियार तथा खरखजाना र चोरी तथा डाँकासम्बन्धी विभिन्न मुद्दा दर्ता भएका छन्। २०७६ सालमा गोली प्रहार गरेको आरोपमा उनी पक्राउ परेका थिए भने सोही वर्ष उनको गोठबाट तीन थान भरुवा बन्दुक बरामद भएको थियो ।
पक्राउ परेका तीनै जनालाई बरामद सामग्रीसहित थप अनुसन्धान तथा कानुनी कारबाहीका लागि इलाका प्रहरी कार्यालय पालुङ मकवानपुर पठाइएको प्रहरीले जनाएको छ ।
प्रतिक्रिया दिनुहोस !
