विराटनगर : मोरङको रंगेलीमा ठूलो परिमाणको लागुऔषध बोकेर नेपाल प्रवेश गरेका एक जना भारतीय नागरिकलाई प्रहरीले नियन्त्रणमा लिएको छ । पक्राउ पर्नेमा भारतको बिहार राज्य, अररिया जिल्लास्थित सिक्टी थाना अन्तर्गत आँपगाछी पञ्चायत–१४ का २५ वर्षीय अभिषेककुमार मण्डल रहेका छन् ।
इलाका प्रहरी कार्यालय रंगेलीका इन्स्पेक्टर अशोककुमार झाको नेतृत्वमा खटिएको टोलीले आइतबार राति करिब ८ः३० बजे रंगेली नगरपालिका–५ भेडुवाथानबाट उनलाई पक्राउ गरेको हो । प्रहरीले भारतबाट नेपालतर्फ आउँदै गरेको बीआर ३८ एएच ८७९८ नम्बरको मोटरसाइकल रोकेर जाँच गरेको थियो । प्रहरीलाई देखेपछि मण्डल भाग्ने प्रयास गरे पनि उनलाई तत्काल नियन्त्रणमा लिइएको थियो ।
मोटरसाइकलको पछाडि राखिएको बोरा खानतलासी गर्दा ट्रामाडोल हाइड्रोक्लोराइड नामक लागुऔषध ३ हजार ५० पत्ता फेला परेको मोरङ प्रहरीका सूचना अधिकारी डीएसपी मकेन्द्रकुमार मिश्रले जानकारी दिए । प्रत्येक पत्तामा १० वटा क्याप्सुल रहेकाले जम्मा ३० हजार ५ सय क्याप्सुल बरामद भएको प्रहरीले जनाएको छ ।
बरामद गरिएको लागुऔषध र मोटरसाइकलसहित मण्डललाई इलाका प्रहरी कार्यालय रंगेलीको हिरासतमा राखेर थप अनुसन्धान अघि बढाइएको छ । उनीविरुद्ध लागुऔषध नियन्त्रण ऐनअन्तर्गत मुद्दा दर्ता गर्ने तयारी गरिएको प्रहरीले जनाएको छ । प्रहरीको प्रारम्भिक अनुसन्धानबाट मण्डल लामो समयदेखि भारतबाट नेपालतर्फ लागुऔषध आपूर्ति गर्ने गतिविधिमा संलग्न रहेको देखिएको छ ।
यस पटक भने उनी आफैं नेपालभित्र रहेका व्यक्तिहरूलाई लागुऔषध पुर्याउन आउँदै गर्दा पक्राउ परेका हुन् । घटनामा संगठित समूहको संलग्नता हुनसक्ने आशंकासहित प्रहरीले लागुऔषध आपूर्ति सञ्जालका बारेमा विभिन्न कोणबाट अनुसन्धान अघि बढाएको छ । अनुसन्धानको निष्कर्षपछि थप तथ्य सार्वजनिक हुने प्रहरीको भनाइ छ ।
प्रतिक्रिया दिनुहोस !
