जोसँग विवाह हुँदै थियो, उसैको हत्या : भावी दुलहीले प्रेमीसँग मिलेर रचेको खतरनाक षड्यन्त्र

भारत : सोनम रघुवंशी तपाईंलाई याद नै होला । हो... त्यही सोनम जसलाई आफ्नो पतिलाई धक्का दिएर मारेमने आरोप लागेको थियो । त्यस्तै किसिमको एउटा घटना अब पुणेबाट बाहिर आएको छ । यहाँ पात्रहरू फरक छन् । सोनमले विवाहपछि घटना गराएकी थिइन् भने यहाँ विवाह अघि नै यस्तो घटना भएको हो ।

लोहागढ किल्लामा केतन विशाल अग्रवाल (२६) को मृत्यु प्रेम षड्यन्त्रमा आधारित हत्या भएको खुलासा भएको छ । प्रहरी अनुसन्धान अनुसार केतनलाई उनकी भावी दुलही (मंगेतर) सिया गोयल र उनका प्रेमी चेतन चौधरीले किल्लाको भीरबाट धकेलेर हत्या गरेका थिए । १९ जुनमा भएको यो घटना वास्तवमा हत्याको तेस्रो र सफल प्रयास भएको प्रहरीको दाबी छ ।

प्रहरीका अनुसार, यसअघि ३१ मे र १४ जुनमा पनि उनीहरूले केतनलाई मार्ने प्रयास गरेका थिए, तर असफल भएका थिए । दुवै पटक घटनालाई दुर्घटनाको रूपमा देखाउने योजना थियो । एक वरिष्ठ प्रहरी अधिकारीका अनुसार अनुसन्धानका क्रममा प्राप्त प्रमाणका आधारमा सिया गोयल र उनका साथीलाई पक्राउ गरिएको छ । घटनाको समयमा दुवै जना घटनास्थलमै उपस्थित थिए । मोबाइल रेकर्ड, डिजिटल प्रमाण तथा अन्य प्राविधिक प्रमाणहरूले यो दुर्घटना नभई योजनाबद्ध हत्या भएको पुष्टि गरेको छ ।

पहिले नै हत्या गर्ने योजना थियो
बताइएअनुसार केतन अग्रवाल आफ्नी मंगेतर सिया गोयल र साथीहरूसँग लोहागढ किल्ला गएका थिए । अर्को महिनामा हुने विवाहअघि सियाको जन्मदिन मनाउने योजना थियो । प्रहरीका अनुसार सिया गोयलको चेतन चौधरीसँग अवैध सम्बन्ध थियो र उनी केतनसँग विवाह गर्न चाहँदैन थिइन् । परिवारले तय गरेको सम्बन्ध तोड्न उनले चेतनसँग मिलेर हत्या योजना बनाएकी थिइन् ।

पहिलो प्रयास ३१ मेमा भएको थियो । त्यसपछि १४ जुनमा सर्पले आक्रमण गरेको बहानामा केतनलाई भीरमा धकेल्ने प्रयास गरिएको थियो, तर असफल भयो । अन्ततः १९ जुनमा सियाले फेरि किल्ला भ्रमणको योजना बनाइन् र चेतनलाई बोलाएर केतनलाई करिब ३५० फिट गहिरो भीरमा धकेलिएको बताइएको छ ।

अनुसन्धान कसरी अघि बढ्यो ?
सुरुमा प्रहरीले यसलाई दुर्घटना मानेर मुद्दा दर्ता गरेको थियो । केतन फोटो खिच्दै गर्दा भीरबाट चिप्लिएर खसेको अनुमान गरिएको थियो । तर सिया गोयलसँगको सोधपुछमा केही कुराहरू लुकाइएको पाइएको थियो । त्यसपछि उनको मोबाइल, सामाजिक सञ्जाल, लोकेसन डाटा र अन्य डिजिटल प्रमाणहरूको अनुसन्धान गर्दा घटनाको वास्तविकता खुल्यो । त्यसपछि प्रहरीले तत्काल कारबाही गर्दै सिया र उनकी साथीलाई पक्राउ ग¥यो । हाल प्रहरीले यस घटनामा अरू कोही संलग्न छन् कि छैनन् भन्ने विषयमा अनुसन्धान जारी राखेको छ । 

केतनको परिवारलाई ठूलो झटका
केतनको परिवारका एक सदस्यका अनुसार विवाहअघि दुवै जना बाली जाने योजना थियो । सबै टिकट र होटल बुक भइसकेका थिए, तर सियाले होटलको बाथरूममा आफ्नो पासपोर्ट च्यातेर फ्याँकेकी थिइन् र योजना रद्द गरेकी थिइन् ।

उनीहरूले थप बताएअनुसार केतनले महाबलेश्वरमा सियाको जन्मदिनका लागि लक्जरी रिसोर्टमा ४० वटा कोठा पनि बुक गरेका थिए । लोहागढमा प्रि–वेडिङ फोटोसुटको पनि योजना थियो । परिवार अहिले गहिरो शोकमा छ र उनीहरूले भनेका छन्, ‘हामीले यस्तो हत्या हुन्छ भनेर कल्पना पनि गरेका थिएनौं ।’