विराटनगर : मोरङको लेटाङ नगरपालिकामा भएका दुई फरक–फरक दुर्घटनामा घाइते भएका दुई जना महिलाको उपचारका क्रममा शनिबार मृत्यु भएको छ। दुवै घटना फरक समयमा भएका हुन्। घाइते महिलाहरूले उपचारका क्रममा मृत्यु भएको हो। कानेपोखरीबाट लेटाङतर्फ जाँदै गरेको अनटेस्ट सीटी सफारी शनिबार बिहान करिब ११:५५ बजेतिर लेटाङ नगरपालिका–३ मा आफैं अनियन्त्रित भएर दुर्घटनामा परेको प्रहरीले जनाएको छ। दुर्घटनामा चार जना घाइते भएका थिए।
प्रहरीका अनुसार घाइतेमध्ये लेटाङ नगरपालिका–४ सिद्धार्थ लाइनकी ६० वर्षीया सन्चमाया लावतीको मृत्यु भएको छ। दुर्घटनामा गम्भीर घाइते भएकी उनलाई प्रारम्भिक उपचारका लागि लेटाङस्थित एडभान्स अस्पताल लगिएको थियो। त्यहाँ उपचार सम्भव नभएपछि थप उपचारका लागि विराटनगरस्थित नोबेल शिक्षण अस्पताल रेफर गरियो। तर, अस्पताल पुर्याउनासाथ शनिबार दिउँसो करिब १ बजेतिर चिकित्सकले उनलाई मृत घोषणा गरेको प्रहरीले जनाएको छ।
उक्त दुर्घटनामा सफारी चालक लेटाङ–४ सिद्धार्थ लाइनका ४० वर्षीय वीरबहादुर राई, सफारीमा सवार ३७ वर्षीया शान्ति राई तथा लेटाङ–५ खेरुवाकी ५० वर्षीया अन्जु राई पनि घाइते भएका छन्। उनीहरूको लेटाङस्थित एड्भान्स अस्पतालमा उपचार भइरहेको प्रहरीले जनाएको छ। प्रहरीका अनुसार तीनै जनाको अवस्था सामान्य रहेको छ। दुर्घटनामा संलग्न सीटी सफारीलाई प्रहरीले नियन्त्रणमा लिएर घटनाको अनुसन्धान अघि बढाएको छ।
त्यस्तै, लेटाङ नगरपालिका–९ जाँतेमा नौ दिनअघि भएको अर्को सडक दुर्घटनामा गम्भीर घाइते भएकी एक युवतीको पनि शनिबार उपचारकै क्रममा मृत्यु भएको छ। मदन भण्डारी लोकमार्गअन्तर्गत लेटाङ–९ जाँतेमा असार ११ गते प्र १–०२–०६० प १७५५ नम्बरको मोटरसाइकलले बाटो काट्दै गरेको को २२ प ९५०९ नम्बरको स्कुटरलाई ठक्कर दिँदा दुर्घटना भएको थियो।
दुर्घटनामा मोटरसाइकल चालक ताप्लेजुङको मिकुवाखोला गाउँपालिका–२ का ३० वर्षीय प्रवीण दाहाल, स्कुटर चालक लेटाङ–९ की २५ वर्षीया चाँदनी राई तथा स्कुटरको पछाडि सवार लेटाङ–९ की २२ वर्षीया मुना दाहाल घाइते भएका थिए। घाइतेमध्ये गम्भीर अवस्थाकी मुना दाहालको विराटनगरस्थित न्युरो अस्पतालमा उपचारका क्रममा शनिबार दिउँसो करिब ३ बजेतिर मृत्यु भएको प्रहरीले जनाएको छ।
प्रहरीका अनुसार मोटरसाइकल चालक प्रवीण दाहाल र स्कुटर चालक चाँदनी राईको उपचार पनि न्युरो अस्पतालमै जारी छ। उनीहरूमध्ये चाँदनी राईको अवस्था गम्भीर रहेको छ भने प्रवीण दाहालको अवस्था सामान्य रहेको प्रहरीले जनाएको छ। प्रहरीले घटनाको अनुसन्धान गरिरहेको छ।
प्रतिक्रिया दिनुहोस !
