एजेन्सी: पाकिस्तानले तीब्रगतिमा आणविक कार्यक्रम अघि बढाएपछि भारतसँग परमाणु यद्धको खतरा बढ्दै गएको छ ।
पाकिस्तानको तर्फबाट आणविक आपूर्तिकर्ता समूह (एनएसजी) मा सामेल हुने प्रयसालाई तीब्र पारिरहेका बेला अमेरिकी कांग्रेसमा पेश गरिएको एक प्रतिवेदनमा यो कुरा उल्लेख गरिएको छ ।
आणविक आपूर्तिकर्ता समूहमा भारतको प्रवेशका लागि अमेरिका र मेक्सिकोसहितका देशले समर्थन गरेपछि पाकिस्तानले पनि यो समूहमा प्रवेश पाउनका लागि आफ्नो 'लबिङ' तीब्र बनाएको हो ।
अमेरिकी कांग्रेसको रिसर्च सर्भिस (सीआरएस) को तर्फबाट हालैमा पेश गरिएको प्रतिवेदन अनुसार भारतले आणविक आपूर्तिकर्ता समूहको सदस्य हुने दौड तीब्र पारिरहँदा पाकिस्तानले पनि आणविक हतियार निर्माणकार्य तीब्र पारेको जनाइएको छ ।
आणविक हतियार निर्माणका लागि परमाणु परीक्षण अभियानलाई पाकिस्तानले तीब्र बनाइरहँदा अमेरिकी संसद्मा दक्षिण एसियका यी दुई देशबीच आणविक लडाइँ हुने चिन्ता व्यक्त गरिएको हो ।
नन पोलिफिरेशनका विश्लेषक पल के के र अर्का विज्ञ म्यारी बेथको तर्फबाट 'पाकिस्तानको परमाणु हतियार' नाम दिएर तयार गरिएको प्रतिवेदनमा पाकिस्तानसँग अहिले ११० देखि १३० को संख्यामा परमाणु हतियारको भण्डार रहेको छ । प्रतिवेदनमा पाकिस्तानसँग रहेको परमाणु हतियारको संख्या अझै धेरै हुनसक्ने अनुमान गरिएको छ ।
प्रेस ट्रस्ट अफ ईन्डियालाई १४ जुनमा प्राप्त भएको यो प्रतिवेदनको प्रतिमा उल्लेखित प्रतिबेदनलाई उधृत गर्दै भारतीय सञ्चारमाध्यमले पाकिस्तानसँग लगातार परमाणु हतियारको संख्या बढ्दै गइरहेको जनाएका छन् ।
पाकिस्तानले भारतविरुद्ध जुनसुकै बेला हुनसक्ने युद्धको तयारीका लागि परमाणु हतियार भण्डारणलाई तीब्र पारेको दाबी समाचारमा गरिएको छ ।
सीआरएस अमेरिकी कांग्रेसको एक स्वतन्त्र अनुसन्धान निकाय हो । जसले बेला बेलामा अमेरिकी संसद्मा विश्वका विभिन्न देशबारे विभिन्न विषयमा प्रतिवेदन दिइरहन्छ ।
यस समूहको धारणालाई आधिकारिकरुपमा अमेरिकी कांग्रेसको धारणा नमानिएपनि यसले दिने प्रतिवेदनलाई भने अर्थपूर्णरुपमा लिइन्छ ।
३० पृष्ठको यो प्रतिवेदन ४८ देश सदस्य रहेको एनएसजीको दौडका लागि पाकिस्तान अमेरिकाको सहयोगको खोजीमा रहेका बेला आएको हो ।
रिपोर्टमा आफ्नो आणविक कार्यक्रमको सुरक्षाको पूर्ण प्रत्याभूति रहेको देखाउन पाकिस्तानले कयौं पटक अन्तर्राष्ट्रिय समुदायको विश्वास जित्ने प्रयास गरेको जनाइएको छ ।
प्रतिवेदनमा पाकिस्तानले तीब्रगतिमा आणविक हतियारको विकास गरिरहेका बेला अब उसको कार्यक्रम प्रश्न घेरामा परेको पनि जनाइएको छ ।
प्रतिक्रिया दिनुहोस !
