रौतहटः श्रीराम सुगर मिल गरुडाले उखु किने वापतको ९० करोड रुपैयाँ भुक्तानी नदिएपछि बारा, सर्लाही र रौतहटका किसानहरु आन्दोलित भएका छन् ।
तीन वर्षको ९० करोड रुपैयाँ मिलले नतिरेपछि आन्दोलिनत किसानहरुले शनिबार दिउँसो १ बजेदेखि ३ बजेसम्म पूर्व–पश्चिम राजमार्ग अवरुद्ध गरेका छन् ।
करिब ३ सयको संख्यामा रहेका तीन जिल्लाका उखु किसानहरुले मिल सञ्चालक दिवाकर गोल्छाको पुत्ला र उखुसहित चन्द्रनिगाहपुरस्थित मूख्य चोकमा बसेर राजमार्ग अवरुद्ध गरेका हुन् ।
साना किसानहरु राजमार्गमै धर्ना बसेपछि यहाँ करिब एक सय गाडीका हजारौं यात्रु अलपत्र परेका छन् ।
सञ्चालक गोल्छासँग पटक पटक छलफल गर्दा रकम भुक्तानी दिने भने पनि झुक्याएकाले बाध्य भएर आन्दोलित हुनुपरेको उखु किसान संघ रौतहटका अध्यक्ष अशोक यादवले बताए ।
किसानहरुले यसअघि दुई दिन चन्द्रनिगाहपुर–गौर सडक खण्डको गरुडामा चक्काजाम गरेका थिए ।
लामो समयदेखि रकम भुक्तानी पाउन माग गर्दा पनि माग सुनुवाइ नगरेपछि बाध्य भएर सडकमा उत्रेको अध्यक्ष यादवले जानकारी दिए ।
उखु किसानहरुले आफूहरुको रकम भुक्तानी पाउनका लागि आइतबारबाट गोल्छा हाउस काठमाडौंमा रिले अनशन बस्ने तयारी गरेका छन् ।
प्रतिक्रिया दिनुहोस !
