विनीता मरहट्टा
काठमाडौं: कलाकार सुनील पोखरेल लामो समयपछि रंगमञ्चमा देखा परेका छन् । सोमनाथ खनालद्वारा निर्देशित मण्डला थिएटरमा मञ्चन भइरहेको नाटक ‘इदमित्थम, एट यो ओन रिस्क'मार्फत सुनील थिएटरमा कमब्याक गरेका हुन् ।
नेपाली रंगमञ्चलाई अहिलेको अवस्थासम्म पुर्याउन सुनीलको ठूलो योगदान रहेको छ । रंगमञ्चमा भर्खरै स्थान बनाउँदै गएका सोमनाथको निर्देशनमा सुनीलको अभिनयले दुई पुस्ताको मेल गराएको छ । पुरानै पुस्ताका लेखक सरुभक्त, पुराना कलाकार र नयाँ निर्देशकलाई जोड्ने पुल इदमित्थम बनेको छ ।
प्राय नयाँ र पुराना पुस्ताबीच सोच विचार र कार्यशैलीमै बिमेल हुने गर्छ तर यो नाटकमा दुई पुस्ताको गजबको संयोग देखिन्छ । असार २ गते सुनीलको जन्मदिनको अवसर पारेर मञ्चन सुरु गरिएको नाटकप्रति दर्शकको चासो बढी देखिएको छ ।
आफ्नै गुरुलाई निर्देशन गर्नु सोमनाथका लागि सजिलो काम होइन तर यही कामबाट उनले जीवनको ठूलो इच्छा पूरा गरेका छन् । युवा पुस्तासँग काम गर्न रुचाउने सुनीललाई पनि यो नाटकप्रतिको उत्साह उस्तै थियो ।
पछिल्लो समय निर्देशकका रूपमा मात्र देख्न पाइएको सुनीललाई अभिनेताको रूपमा मञ्चमा देख्न पाउँदा रंगकर्मीहरूमै पनि बढी उत्साह देखिएको छ ।
सुनीलको एकल प्रस्तुति नाटकप्रतिको रुचि बढाउने अर्को कारण हो । सुनील कस्तो र कुन रूपमा देखा पर्छन् होला भन्ने उत्साह धेरैको थियो । तर जब सुनील मञ्चमा देखिए, उनी बाहिर भेटिने सुनीलभन्दा फरक देखिएनन् । उही साधारण शैलीमा उनको आगमन भयो ।
सुनीलको साधारण शैलीमा सेट भने अनावश्यक ठूलो देखियो । राजनीतिक विषयवस्तु र एक साधारण व्यक्तिको धारणा नाटकको मुख्य विषयवस्तु हो । मनभित्र प्रेमको गहिरो चोट अनि घाइते शरीर लिएर बाँचेको एक व्यक्तिको जीवनप्रतिको बुझाइ नाटकले देखाएको छ । अनुभवी कलाकार भए पनि त्यति धेरै सक्रिय नभइरहेको अवस्थामा उनको प्रस्तुति राम्रो मान्नेहरूले प्रशंसा गरे ।
सुनील आफैंले आफ्ना कमजोरीलाई स्वीकार गरेका छन् । उनले बीचबीचमा संवाद बिर्सिए, लाइटमा फोकस आउट भए । ‘मेरो प्रेम तपाईंले चुनावमा टिकट नपाएजस्तै भयो', ‘घाइतेलाई जिन्दगी कविताजस्तो होइन अकविता जस्तो लाग्छ' जस्ता मार्मिक संवादहरूले नाटकलाई रमाइलोसँगै मार्मिक बनाएको छ ।
सेटको कुनाकुनाबाट रक्सीका बोतल निकाल्दै पिएको दृश्यहरू दर्शकलाई सबैभन्दा रोचक लाग्छ । सुनीलको आनीबानी थाहा पाएकालाई यो दृश्य उनको जीवनसँग ठ्याक्कै मेल खाएजस्तो लाग्छ । ५५ मिनेट लामो नाटकमा दर्शकलाई एकैछिन पनि सुनीलबाट दृष्टि हटाउने इच्छा हुँदैन । नाटक असार ११ गतेसम्म मञ्चन हुनेछ ।
प्रतिक्रिया दिनुहोस !
