काठमाडौं: जितेन्द्र रसिकको गजल संग्रह ‘काफिया' र ऋद्धिलक्ष्मी कायस्थको कविता संग्रह ‘मौनता बोल्छ' शुक्रबार राजधानीमा विमोचन गरिएका छन् ।
भक्तपुर साहित्यिक समाजले आयोजना गरेको कार्यक्रममा वरिष्ठ गजलकार ज्ञानुवाकर पौडेल, वरिष्ठ गीतकार राजेन्द्र थापा, गीतकार एवं गजलकार गोपीकृष्ण ढुंगाना र कृष्णलाल प्रधानले दुई कृतिको विमोचन गरेका हुन् ।
पौडेलले रसिकका फूलमा दुई चार काँडा भएझैं रसिकलाई कमजोर देखाउनेहरु छन् भने उनको साहित्यिक यात्रा अझ अघि बढ्ने बताए ।
गजलमा काव्यात्मक सुवास भएको बताउँदै उनले भने, ‘अहिले गजललाई साहित्यिक विधा नमान्ने आवाज आइरहेको छ तर रसिकजस्तै उदियमान गजलकारहरुको सशक्त कलमले यसको जवाफ दिँदैछ ।' उनले कायस्थका कृति पहिलो भए पनि कविताहरु उदियमानजस्ता नलागेको बताए ।
थापाले अधिकांश गजलमा गेयता र गीतिपन रहेको बताए । उनले ९० प्रतिशत गजलकारमा गेयता नभएको बताए । उनले कायस्थका कवितामा संभावना रहेको बताए ।
रसिकको कृतिमाथि समीक्षा गर्दै गजलकार गोपीकृष्ण ढुंगानाले गजलहरुले जीवन र जगतलाई समेटेको बताए । उनले भने, ‘रसिकले गजलमा जीवनमा देखिएका भ्रमहरुलाई पनि जीवन्त प्रस्तुत गरेका छन् ।' कार्यक्रममा समाजका अध्यक्ष राजुराम मुनकर्मी, विना पन्त लोहनीलगायतले बोलेका थिए ।
प्रतिक्रिया दिनुहोस !
